शिवराज । कपिलवस्तुको शिवराज नगरपालिकामा एउटा नयाँ कामको थालनी भएको छ । सम्भवतह नगरपालिकाले लुम्बिनी प्रदेशका १०९ स्थानीय तहमा पहिलो पटक यस्तो कामको थालनी गरेको हो । त्यो हो कार्यालय समयअघि राष्ट्रिय गान गाउनु पर्ने अनिवार्य नियम ।

नगरपालिका प्रमुख अजय थापाका अनुसार जनप्रतिनिधि र कर्मचारीमा राष्ट्रिय भावनाको जागृत गराउनको लागि यस्तो कामको थालनी गरिएको हो । अब स्कुलका विद्यार्थीले झैँ नगरमा रहेका जनप्रतिनिधि, कर्मचारी, नगर प्रहरी र अरु कर्मचारी पनि नगर बाहिरको प्रागंगणमा राष्ट्रिय गानमा अनिवार्य सहभागि हुनुपर्ने छ ।

त्यसको लागि १० बजे अघि नै कर्मचारी र जनप्रतिनिधि कार्यालय आउनु पर्ने थापाले अपिटाइम्सलाई बताए । राष्ट्रिय गानपछि मात्र नगरपालिकाको अरु सेवा सुरु हुने मेयर थापाले जानकारी दिए । यस कार्यलाई धेरैले राम्रो मानेको उनले बताए ।
उनले दोहोर्याए, ‘यो काम जनप्रतिनिधि र कर्मचारीमा राष्ट्रिय भावना जगाउन गरिएको हो । स्कुलका विद्यार्थीलाई त्यहि सिकाउँछौँ हामी पनि किन नगर्ने ।’ मुलुकभर सबैले यहि कार्य गरेको खण्डमा शुशासन वृद्धि र देशभक्तिको भावना वृद्धि गर्न टेवा पुग्ने उनले विशवास लिए ।