चन्द्रकान्त न्यौपाने, जितपुर । मंच त अतिथिले टम्म भरिएको थियो थियो दर्शक दीर्घामा पनि सयौँ ब्यक्ति । सबैको अनुहारमा उस्तै चमक र खुसी । सोमबार मंचमा गमक्क परेर बसेका अतिथिभन्दा बढ्दा खुसी देखिन्थे तल्लो भागमा बसेका दर्शकहरु। किनकि मंचका अतिथिको मात्र होइन दर्शक दीर्घामा बसेका सबै ब्यक्तिलाई बराबर सम्मान थियो । अध्यक्ष, प्रमुख अतिथि, विशिष्ट अतिथि भनेर छुट्याउन मुस्किलै हुने गर्दथ्यो ।

मञ्चभरी पनि अतिथिको लाइन थियो भने मञ्चदेखि तल पनि दर्जनौँ अतिथि थिए । अतिथिसंगै दर्शक पनि थिए । तर को दर्शक को अतिथि छुट्याउन सकिदैनथ्यो ? कार्यक्रममा सहभागि पुरुष दर्शकका शिरमा ढाका टोपी ढल्किएको थियो भने महिलाहरुको गलामा ढाकाको न्यायनो पछ्यौरा सजिएको थियो । यस्तो भएपछि दर्शकहरुमा पनि खुसीको सिमा थिएन ।

कार्यक्रम थियो, ‘श्रृङ्गीघाट सामुदायिक वन उपभोक्ता समुह बाणगंगा कपिलवस्तुको १२ औँ साधारण सभा र ५ औँ अधिवेशन ।’ सधैँ नयाँ काम गरेर चर्चा कमाइरहेको सो वनले साधारण सभा र अधिवेशनको खुला सत्रको कार्यक्रमलाई बिभिन्न तवरले नयाँपनमा ढाल्ने प्रयास गरेको थियो ।

जसको अतिथि र दर्शक सम्मान नयाँ थियो । धेरै संघसंस्थाका कार्यक्रममा प्लाष्टिकका खादा र माला पहिराएर अतिथि सम्मान हुने गरेकोमा यसपटक वनले राष्ट्रिय भावनाको जागृत गराउने गरी अतिथि/दर्शक सम्मान कार्यक्रम गर्यो भने अध्यक्ष, प्रमुख अतिथि, विशिष्ट अतिथि कसैलाई पनि भेद गरेन । यसपछि सबैले उक्त कामको प्रसंसा गरेका हुन् ।

अतिथिको मञ्च र दर्शक दीर्घाका पुरुषहरु ढाका टोपीमा ढल्कँदा र महिलाहरुको गलामा ढाकाको न्यायो पछ्यौरा सजिएको दृश्य निकै सुन्दर देखिन्थ्यो ।

यहि कारण मञ्चका अतिथि र दर्शकलाई फोटा र भिडिओ खिच्न भ्याई नभ्याई थियो । घरमा खादा मालाको कतै प्रयोग नभएपछि सार्वजनिक पद धारण गरी दिनहुँ कार्यक्रममा ठोक्किने ब्यक्तिका घरघरमा डम्पिङको रुपमा अहिले तिनै खादा माला छन् । अन्य कार्यक्रममा अतिथिलाई सम्मान र दर्शकलाई निस्तो राखिने गरेकोमा श्रृङ्गीघाटले भने त्यस्तो गरेन । प्रमुख, विशिष्ट अतिथिदेखि अरु अतिथि र दर्शकसम्मको शीर र गलामा ढाकाटोपी र पछ्योरी पहिराइदियो ।

अतिथि बनेर लिएका यस्ता खादा माला अब कता फालौँ भन्ने हुन्छ जनप्रतिनिधि र सार्वजनिक पद धारण गरेका ब्यक्तिलाई । आफू पनि दिनहुँ यस्ता कार्यक्रममा ठोक्किन पुगेको भन्दै एक बर्षमा गरिने वनको ठुलो कार्यक्रममा नयाँ गर्ने प्रयास गर्न खोजिएको अध्यक्ष शुशिलसिंह ठकुरीले बताए ।

उनले भने, ‘अतिथि सम्मानमा प्रयोग गरिएको वस्तु फेरि प्रयोगमा आओस्, मान्छेले पटकपटम प्रयोग गरुन् भनेर पुरुषहरुको लागि ढाका टोपी र महिलाहरुको लागि ढाकाकै न्यानो पछ्यौरी प्रयोग गरिएको हो । तर सबैले यसलाई निकै राम्रो मान्नु भएको रहेछ । कार्यक्रममा पनि सबैको शिरबाट राष्ट्रियता ढल्किरहेको थियो । यस्तो प्रसंसा पाऔँला भनेर त्यो गरिएको थिएन, जे होस् खुसी लागेको छ ।’ कार्यक्रमको लागि मात्र सिमिति नभएर ती ढाकाटोपी र पछ्यौरी अन्य समयमा पनि काम लाग्ने खालका गुणस्तरिय छन् ।

यसले सबै समान छन् भन्ने सन्देश दिएको सहभागी एक जना उपभोक्ताले बताए । समुहमा सल्लाह गरेर यस्तो सुरुवात गरिएको उपाध्यक्ष बुद्ध शाही बताउँछन् । कार्यक्रमका गतिविधि राम्रा भए पनि भाषण गर्ने अतिथिको लाइनले दर्शक दिक्क जस्तो देखिन्थे । कार्यक्रमको बन्द सत्र नै लामो हुँदा अतिथि र दर्शक आत्तिएको देखिन्थे ।

अतिथि सम्मान मात्र नभएर बनले सोही कार्यक्रममै अरु केहि नयाँ काम पनि गरेको छ । अर्को चर्चा लायक काम वनले कपिलवस्तु सामुदायिक अस्पतालसंग गरेको सम्झ्यौता हो । अस्पतालमा १५ लाख लगानी गरेर उपभोक्ताको उपचारमा ३५ प्रतिशतसम्म छट पाउने गरी अस्पतालसंग सम्झ्यौता गरेको हो ।

अब वनको कार्ड देखाएर उपभोक्ताले कपिलवस्तु सामुदायिक अस्पतालमा औषधीबाहेक अरु उपचार खर्चमा ३५ प्रतिशत पाउने अध्यक्ष ठकुरीले बताए । यस कार्यलाई पनि सहभागि भएका सबैले राम्रो र अनुकरणीय मानेका छन् ।

यता साधारण सभामै खोजी खोजी वनमा योगदान दिएका संस्थापकहरुलाई सम्मान गरिएको थियो भने महिला उद्यमी बनेका ब्यक्तिलाई पनि सम्मान गरिएको थियो ।

उपभोक्ता भएर जीवन निर्वाहा गर्न अटो रिक्सा चालक महिलाहरुलाई पनि वनले नगद, काँसको बेला र सम्मान पत्रले सम्मानित गरिएको थियो । समाजमा उहाँहरुको कामलाई सबैले सम्मान गरुन् भन्ने सन्देश दिन यसको गरिएको सचिव शुष्मा खाँणले बताइन् ।