कपिलवस्तु । कपिलवस्तुको बाणगंगा २ नन्दनगर स्थित कैलाश आश्रम परिषर दुलहीझैँ सिंगारिएको छ । भोलिदेखि सुरु हुने ‘३० औँ श्री वराहपुराण पाठ पारायण तथा श्रीमद् भागवत महापुराण धन धान्याञ्चल ज्ञान–महायज्ञ’ को लागि महायज्ञस्थल कैलाश आश्रम सिंगारिएको हो ।

परिषरमा चारैतिर ध्वजा पताका लगाइएको छ भने पोखरी पनि ध्वजापताकाले सुन्दर देखिएको छ । यसैबीच मंसिर १६ गतेसम्म हुने महायज्ञको सम्पुर्ण तयारी पुरा भएको आयोजक मनकामना संस्कृत गुरुकुल प्रवर्धन समाजले बतायो । दिउँसो १ बजे नेपाल सरकारका संस्कृती पर्यटन तथा नागरिक उड्यन मन्त्री बद्री प्रसाद पाण्डेले समुद्घाटन गर्ने कार्यतालिका रहेको छ ।

शुबार साँझ पत्रकार सम्मेलन आयोजना गरेर समाजले उक्त कुराको जानकारी दिएको हो । समाजका अनुसार उद्घाटन अघि विहान ९ बजेदेखि वैरियादेखि बाजागाजा र झाँकीसहितको शोभा कलस यात्रा सुुरु हुने छ ।

यस महायज्ञबाट ८ हजार क्विन्टल अन्न संकलन गर्ने र त्यसबाट गुरुकुलमा रहेका बटुकको बर्षभरीको खाना र भण्डारा चलाउने लक्ष्य रहेको समाजका अध्यक्ष रविराज ज्ञवालीले बताए ।

महायज्ञको प्रमुख वाचकमा प्रसिद्ध कथावाचक दीपक सापकोटा रहेका छन् भने भारतबाट पनि विद्धान र विदुषीहरु आउने महायज्ञका संरक्षक सन्तशिरोमणी १००८ स्वामी लोकानन्द महाराजले जानकारी दिए ।

गुरुकुल संचालन र बटुकको खानपानको लागि महायज्ञ आयोजना गरिएको हुँदा मनैबाट सकेको सहयोग गर्न उनको सबैमा आग्रह छ । महायज्ञबाट करिव ४० लाखको आर्थिक तथा ८ हजार क्विन्टल अन्नदान संकलन गर्ने अपेक्षा आयोजकको छ ।

बैदिक सत्य सनातन धर्मको रक्षार्थ राष्ट्र शान्ति र विश्व शान्तीको कामना सहित महायज्ञ आयोजना गरिएको प्रचार प्रसार उप समिति संयोजक तथा समाजका उपाध्यक्ष जगतराज रेग्मीले बताए । अहिलेसम्मको प्रचारप्रसारले आफूहरु उत्साहित रहेको उनको भनाई छ ।

अहिले गुरुकुलमा १ सय २५ जना बटुकहरुले अध्ययन गरिरहेका छन् । उनैको भरण पोषणको लागि महायत्र आयोजना गरिएको हो । पत्रकार सम्मेलनमा प्रवर्धन समाजका सचिव कमल पौडेल, व्यवस्थापक मोहन प्रसाद पन्थी, प्राचार्य कृष्ण प्रसाद पोख्रेल लगायतले महायज्ञ संचालनको उद्देश्यबारे प्रकाश पारेका थिए । पत्रकार सम्मेलनमा बाणगंगाका क्रियाशिल पत्रकारहरुको सहभागिता थियो ।

महायज्ञमा बाणगंगा राइडर्स क्लवले प्रमुख रुपमा प्रचार प्रसार गरेको छ । आयोजकले राइडर्सको सहयोगले आफूहरुलाई निकै टेवा पुगेको भन्दै धन्यबाद दिए ।