चन्द्रकान्त न्यौपाने, जितपुर । १५ औँ कपिलवस्तु महोत्सवमा नयाँ आकर्षणको रुपमा बिभिन्न खेलहरु हुने भएका छन् । बालुवामा साइक्लिङ च्यालेञ्ज गर्ने कार्यक्रम पहिलोपटक आयोजना हुँदै गर्दा कपिलवस्तु महोत्सवको इतिहासमा पहिलोपटक प्रदेश स्तरीय महिला कबड्डी (लुम्बिनी) प्रतियोगिता पनि हुने निधो भएको हो । कबड्डी महोत्सव स्थल बुद्ध रंगशालाको एक भागमा ३ दिनसम्म हुनेछ ।

आयोजक कपिलवस्तु उद्योग बाणिज्य संघले यस विषयमा तयारीसमेत सुरु गरेको युवा तथा खेलकुद संयोजक पंकज पाण्डेले अपिटाइम्सलाई जानकारी दिए ।

उनका अनुसार आजै मिति टुङ्गो लाग्नेछ भने पुरस्कारबारे पनि आजै जानकारी दिइने छ । पाण्डेले कपिलवस्तुबाट पनि एउटा टिम हुने बताए । कपिलवस्तुसंगै प्युठान, अर्घाखाँची, रुपन्देही, दाङ, रोल्पा, बाँके र बर्दियाबाट सहभागि महिला टिमबीच निकै रोचक प्रतिस्पर्धा हुने संयोजक पाण्डेको दावी छ ।

महोत्सवमा नयाँपन दिन विगतका बिभिन्न कार्यक्रम मुल्यांकन गरेर नयाँ नयाँ कार्यक्रम ल्याउने सोच अनुसार कबड्डी खेल ल्याउन लागिएको पाण्डेले बताए ।

गत बर्ष रेस्लिङ, त्यसअघि कुस्ती, लगायतका खेल भएपनि कबड्डी अहिलेसम्म भएको थिएन । तर यस क्षेत्रमा कबड्डी खेलप्रति पनि रुची भएको हुँदा यस्तो निर्णय भएको संघका अध्यक्ष तथा महोत्सव मूल समारोह संयोजक गणेश बहादुर क्षेत्रीले जानकारी दिए । यस प्रतियो्गिताले धेरैलाई उत्साहित बनाएको आयोजक बताउँछ ।

बालुवामा साइक्लिङ च्यालेञ्ज बाणगंगा राइडर्स क्लवले गर्दैछ भने भलिबलको पनि तयारी भइरहेको छ । बाणगंगा नगरपालिका अन्तर्गतका विद्यालयलाई केन्द्रमा राखेर महिला भलिबल प्रतियोगिता हुन लागेको बताइएको छ । महोत्सव मंसिर १९ गतेदेखि पौष २ गतेसम्म हुनेछ । २ लाख दर्शक भिाउने र करिब ५ करोड बराबरको आर्थिक कारोबार गर्ने आयोजकको लक्ष्य छ ।