अपिटाइम्स, कपिलवस्तु । बाणगंगा वेयलफेयर सोसाइटीको आयोजनामा आगामी मंसिर २१ गतेदेखि पौष १ गतेसम्म हुन लागेको १४ औं कपिलवस्तु महोत्सव, कृषि पर्यटन तथा औद्योगिक प्रदर्शनीको तयारी तीव्र छ । ‘युवा स्वरोजगारको बलियो आधार उद्योग पर्यटन र कृषि क्षेत्रको प्रचार प्रसार र प्रवद्र्धनमा प्रोत्साहन’ भन्ने मूल नाराका साथ हुने महोत्सवमा अहिले स्टल निर्माण र बुकिङको काम भइरहेको छ ।

बुद्ध रंगशालामा हुने महोत्सवमा कृषि, हस्तकला, प्रविधि, पर्यटन, दैनिक उपभोग्य सामाग्री तथा लत्ता कपडा आदिका करिब ३ सय स्टल रहने संयोजक मिन थापाले बताए । उनका अनुसार तीमध्ये व्यवसायिक १ सय ८०, कृषिका स्टल २०, घरेलुका ५० र विभिन्न प्रदर्शनका ५० बढी स्टल हुने छन् । उनले अहिलेसम्म ६० प्रतिशत स्टल बुकिङ भइसकेका र अब ४० प्रतिशत मात्रै बाँकी रहेको बताए ।

महोत्सवका संयोजक तथा वेलफेयरका अध्यक्ष राज कुमार खाँणले स्थानीय आएसम्म ४० प्रतिशत स्टल हिस्सा दिइने बताए । उनले भने ‘स्थानीय स्टलधनीलाई महोत्सवमा आउन आग्रह गर्दछु । हाम्रो सोँच स्थानीयलाई प्राथमिकतामा राख्ने हो । तर समयमा नआएको खण्डमा हामीले अरुलाई दिनुपर्ने हुन्छ । तिनचारदिनभित्र उहाँहरु आएमा हिसाबै गरेर ४० प्रतिशत दिइन्छ । समयमै नआएमा बाध्य भएर बाहिरकालाई दिनुुपर्ने हुन्छ । अझै केहि बाँकी छन् , समयमा सम्पर्क गर्ने स्थानीयले स्टल पाउनुहुन्छ । ‘ अहिलेको महोत्सव हरेक हिसाबले सफल बन्ने अध्यक्ष खाँणले बताए ।