चन्द्रकान्त न्यौपाने

कपिलवस्तु । विहानी राहादानी सेवा सुरु भए पछि कपिलवस्तुका सेवाग्राहीलाई सहज भएको छ ।

पछिल्लो समय सेवा प्रवाहमा निकै राम्रो काम गरिहेको जिल्ला प्रशासन कार्यालयले पहिलोपटक विद्युतीय राहदानीका लागि विहान ७ बजेदेखि नै सेवा सुरु गरेपछि सेवाग्राहीलाई सहज भएको हो ।

राहदानी लिनका लागि सेवाग्राहीको चाप बढेपछि प्रशासनले यस्तो ब्यवस्था सुरु गरेको प्रमुख जिल्ला अधिकारी शंकरहरि आचार्यले बताए । विहानी सेवा थप भएसंगै अब राहादानी सेवा दुई चरणमा हुने छ ।

वैशाख २९ गतेबाट सुरु भएको सेवाको पहिलो चरण अन्तर्गत बिहान ७ बजेदेखि ११ बजेसम्म सेवाग्राहीले सेवा लिन सक्ने छन् भने ११ बजेदेखि साँझ ६ बजेसम्म पनि सेवा लिन सक्ने छन् । यसरी सेवा विस्तार गर्दा कर्मचारी र सेवाग्राही दुवैलाई फाइदा हुने प्रशासनको अपेक्षा छ ।

प्रजिअ आचार्य भन्छन्,“सेवाग्राहीको चाप व्यवस्थापन गरी एक दिनमै राहदानीको आवेदन दिन मिल्ने गरी कार्यालय समय १०–५ को सीमालाई परिवर्तन गरी सेवा प्रवाहको समय विस्तार गरिएको छ ।“ कार्यालयले राहदानीको प्रत्यक्ष अनलाइन आवेदन फर्म भरिदिने व्यवस्था समेत गरेको छ । दैनिक सयौको संख्यामा राहादानी सेवा लिनको लागि सेवाग्राही कार्यालयमा आउने गरेका प्रशासन बताउँछ ।

जिल्लामा प्रजिअ आचार्य आएपछि राहादानीको विद्यूतीय अनलाइन फारममा विचौलियाले गरेको ब्रहम्लुट पनि बन्द भएको छ । ४ हजार रुपैयाँसम्म तिरेर कार्यलय बाहिर अनलाइन फारम भर्नुपर्ने सेवाग्राहीको बाध्यता थियो । चौतर्फी गुनासोपछि उनले अहिले कार्यालय भित्रै निशुल्क फारम भर्ने ब्यवस्था मिलाएका छन् ।

सेवाग्राहीको सुविधालाई मध्यनजर गर्दै अब लागि राष्ट्रिय वाणिज्य बैंकको शाखा पनि ल्याउने तयारी भएको उनले बताए । यो सुविधा पछि राजश्व बुझाउन सेवाग्राहीले भोग्नुरेको झन्झट समेत अन्त्य हुने प्रजिअ आचार्यले अपिटाइमसलाई बताए ।

कार्यालयले शानिवार बाहेक अन्य सार्वजनिक विदाका दिन पनि उल्लेखित सेवा प्रदान गरिने सूचनामार्फत् जनाएको छ ।