काठमाडौँ । नेपाल सुनचाँदी व्यवसायी महासङ्घले यो साता सुनको मूल्य तोलामा एक हजार रुपैयाँले गिरावट आएको जानकारी दिएको छ । गत साताको अन्तिम कारोबार दिनको तुलनामा यो साता एक हजार रुपैयाँले मूल्य घटेको महासङ्घले जानकारी दिएको हो ।

गत साताको अन्तिम कारोबार दिन सुनको मूल्य तोलामा १ लाख ११ हजार ८०० रुपैयाँ कायम थियो । जुन, यो साताको अन्तिम कारोबार दिन अर्थात शुक्रबारसम्म आइपुग्दा १ लाख १० हजार ८०० रुपैयाँ कायम भएको छ । यस्तै, यो साता तेजाबी सुनको मूल्य १ लाख १० हजार २५० रुपैयाँ प्रतितोलामा आएर रोकिएको छ ।

यो साताको आइतबार नै सुनको मूल्य घटेर कारोबार भएको थियो । आइतार तोलामा एकै दिन १२ सय रुपैयाँले सुनको मूल्य घटेको थियो । यस्तै, सोमबार तोलामा ३०० रुपैयाँले बढेको थियो भने मंगलबार पनि ३०० रुपैयाँले बढेको थियो ।

बुधबार पुनः ४०० बढेर बिहीबार स्थिर कायम भएको सुनको मूल्य शुक्रबार पुनः तोलामा २०० रुपैयाँले बढेर सुनको भाउ रोकिएको हो । यस्तै, यो साता चाँदीको मूल्यमा समेत भारी गिरावट आएको छ ।

गत साताको अन्तिम कारोबार दिन तोलामा १४ सय ४५ रुपैयाँ कायम रहेको चाँदीको मूल्य यो साताको शुक्रबारसम्म आइपुग्दा १३ सय ७५ रुपैयाँ कायम भएको छ । यस अवधिमा यो ७० रुपैयाँ प्रतितोलाको गिरावट हो ।