काठमाडौँ । नेकपा (एमाले)का सचिव योगेश भट्टराईले कानुनभन्दा माथि कोही पनि नभएको भन्दै नेपाली नागरिकलाई नक्कली भुटानी शरणार्थी बनाएर अमेरिका पठाउने प्रकरणमा संलग्न जोसुकै भए पनि प्रहरीमा गएर बयान दिनुपर्ने बताएका छन् । उनले उक्त प्रकरणमा नाम जोडिएको भएमा जोसुकै व्यक्ति भए पनि प्रहरीकहाँ गएर आफ्नो बयान प्रस्टसँग भन्नुपर्ने धारणा राखेका छन् ।

तत्कालीन प्रधानमन्त्री तथा एमालेका अध्यक्ष केपी शर्मा ओलीका स्वकीय सचिव राजेश बज्राचार्य र सल्लाहकार अयजक्रान्ति शाक्यले पैसा लिएको सार्वजनिक भएको सन्दर्भमा एमाले सचिव भट्टराईले यस्तो अभिव्यक्ति दिएका हुन् ।

संघीय संसद् भवन परिसरमा बुधबार सञ्चारकर्मीसँग कुरा गदै भट्टराईले नक्कली शरणार्थी प्रकरणमा जोडिएका व्यक्तिले सहयोग गर्नुपर्ने बताएका हुन् ।
उनले भने,का थिए यदि मेरो नाम कसैले लिएका छन् र, त्यसमा मेरो संलग्नता छ कसैले भन्यो भने मलाई प्रहरीले बोलाउनु पर्दैन । म आफैं प्रहरीकोमा बयान दिन जान्छु ।अध्यक्षका स्वकीय सचिव हुन् कि मेरो स्वकीय सचिव हुन् कि म नै भए पनि, मलाई कसैले पोल्छ भने प्रहरीले मलाई सूचना गरिदिए हुन्छ । तपाईंको नाम आएको छ, के गरौं ? भन्यो भने म थपक्क गएर बयान दिएर आउँछु । किनभने म नागरिक हो । नागरिकचाहिँ कानुनभन्दा माथि कोही पनि हुँदैन ।

सांसद भट्टराईले नक्कली भुटानी शरणार्थी प्रकरणमा प्रहरी महानिरीक्षक बसन्त कुँवरको नाम आएको विषयमा पनि आफ्नो धारणा राखेका छन् ।