चन्द्रकान्त न्यौपाने
वाणगंगा । नेपाल पत्रकार महासंघ कपिलवस्तुका अध्यक्ष किरणमान बज्राचार्यले जिल्लाका स्थानीय तह र पत्रकारमा रहेको वेथितिको पोल खोलेका छन् ।

रिपार्ट्स क्लल लुम्बिनी प्रदेशले वाणगंगामा आयोजना गरेको शुसासनको लागि साक्षरता विषयक कार्यक्रममा अध्यक्ष बज्राचार्यले १० वटै स्थानीय तहमा शुसासन कायम हुन नसकेको भन्दै ध्यानाकर्षण गराएका हुन् ।
कार्यक्रममा ढिला आइपुगेका अध्यक्ष बज्राचार्यले करिब १५ मिनेट हाँस्दै भाषण गरे । यो बिचमा उनले स्वयम् पत्रकारलाई पनि छोडेनन् ।

सुरुमा उनले मान्छेको सोचाइ नै राम्रो नभएको बताए । उनको भनाईको आसय छ कि ‘अचेल मान्छेको मनमा नराम्रो कुरा मात्रै आउँछ । अरुले गरेको नराम्रो कुराको मात्रै टिप्पणी गरेर मान्छे बस्छ । आजभोलि मान्छे गन्हाउने मोजाजस्ता भए । आफूले लगाएको छ, त्यसले अरुलाई पनि नराम्रो गन्ध दिएको छ । लगाउनेलाई नै थाहा छैन मेरो मोजा कति गन्हाइरहेको छ भनेर ।’

राज्यले चौथो अंगको दर्जा दिएका पत्रकार पनि यहि आजभोलि स्थितिमा रहेको उनले बताए । ‘पत्रकारले पनि राम्रो कुरा लेख्न सकिरहेका छैनन् । खाली नराम्रो कुरा मात्रै लेख्छन् । अब पत्रकार पनि सुध्रनु पर्दछ । पत्रकारमा पनि सुशासन आवश्यक छ’, उनले भने ।

त्यसपछि भने उनी स्थानीय तहमाथि खनिन सुरु गरे । उनले स्थानीय तहमा भ्रष्टाचार बढेको, पारदर्शिता कायम नभएको लगायतका आरोप लगाए । जनप्रतिनिधि र कर्मचारी बिभिन्न विवादमा फसेर सेवाप्रवाह प्रभावित भइरहेको समेत उनले बताए ।

उनले केहि पालिकाको नामै किटेर पोल खोल्न सुरु गरे । जिल्लाका १० स्थानीय तहमध्ये राम्रो मानिएको वाणगंगामा शुसासन नभएको भन्दै उनले भने ‘खोलाको कारण यो नगरपालिका बदनाम छ । अख्तियारमा उजुरी र मुद्धा परिरहन्छ । त्यहि कारण यहाँका हाकिम ३ महिना पनि टिक्न सक्दैनन् । अगाडि गमक्क परेर बसेका प्रमुख प्रशासकीय अधिकृतलाई देखाउँदै हाँसिहाँसि उनले भने ‘मैले सुनेको छु । तपाईँ अर्को ठाउँ खोज्दै हिँड्नु भएको छ रे । उहाँ पनि अब कितदिन हो यहाँ थाहा छैन । वाणगंगामा अरु पनि समस्या छन् भन्ने सुनेको छु ।’

त्यसपछि उनले बुद्धभूमि, महाराजगंज, र शिवराज नगरपालिकाको कुरा झिके । बुद्धभूमिमा पनि एक बर्षमा पटकपटक हाकिम चेन्ज हुने समस्या छ । जनप्रतिनिधि र कर्मचारी मिल्दैनन् । शिवराजतिर पनि उस्तै छ । बिभिन्न समस्या आइरहेका छन् । जनता कामबाट सन्तुष्ट छैनन् । यशोधरा, शुद्धोधन र मायादेवी गाउपालिकाको कुरा नगरौँ । यशोधरामा त अति नै भइसक्यो । लफडा र अख्तियारमा मुद्धा परेपछि लेखाअधिकृत विदामा छन् । सेवाग्राहि पीडामा छन् । त्यहाँको झगडा र लडाई मेरो मोबाइलमै छ । यस्तो अवस्था छ , उनले भने ।

अध्यक्ष बज्राचार्यले कृष्णनगर नगरपालिकामा हाकिम र कर्मचारीको केहि नलाग्ने बताए । अन्य पालिकामा कर्मचारीले पालिका चाएको सुनिन्छ । कृष्णनगरमा मेयर सापको अगाडी कसैको केहि चल्दैन । त्यहाँका कर्मचारी नीरिहजस्तै छन्’, उनले भने । कपिलवस्तु नगरपालिका र विजयनगर नगरपालिकाको भने उनले नाम लिएनन् ।

उनले अब शुसासन ल्याउन सबै मिलेर लाग्नुपर्ने बताए । जिल्लामा एक पत्रकारले अर्को पत्रकारको खेदो खन्ने, राम्रो कामको प्रसंसा गर्न नसक्ने जस्ता समस्या रहेको स्विकार गर्दै अब पत्रकारले पनि सहि कुरा बाहिर ल्याउन आवशयक रहेको बताए । पत्रकारको नाममा गैर पत्रकार पनि रहेका कारण अहिले महासंघले पत्रकार शुद्धिकरणको अभियान पनि चलाएको उनको भनाई छ ।

कार्यक्रममा कपिलवस्तु नगरपालिकाका प्रमुख सुदिप पौडेल, प्रमुख जिल्ला अधिकारी शंकरहरि आचार्य, जिल्ला प्रहरी प्रमुख प्रेम बस्नेत, जिल्लाका बिभिन्न सरकारी कार्यालयका प्रमुख र प्रतिनिधिको सहभागिता थियो । कार्यक्रम क्लवका अध्यक्ष राम कुमार क्षेत्रीको अध्यक्षतामा सम्पन्न भएको थियो ।