काठमाण्डौँ । कपिलवस्तुको वाणगंगा नगरपालिकाको पश्चिमी सिमातर्फ पर्ने वडा नम्बर ७ मा पर्ने बनगाई चोक दिनप्रतिदिन सुन्दर हुँदै गएको छ । वडा अध्यक्ष विष्णु गिरीको सक्रियताले रुप परिवर्तन गरिरहेको बनगाई अहिले रातको समयमा झलमल्ल देखिन्छ भने फराकिलो बाटोले विकसित सहरको झल्को दिन्छ ।

अहिले यहि सौन्दर्यीकरणलाई थप उचाइमा पुर्याउन वृक्षरोपण लगायतका कार्यक्रम भइरहेका छन् । यसै सन्दर्भमा ग्लोबल आइएमइ बैङक बनगाई शाखाले सामाजिक उत्तरदायित्व अन्तर्गत सोमबार वृक्षरोपण गरेको छ । वडा अध्यक्ष गिरीको प्रमुख आतिथ्यमा डोहोटे मार्गको सडक किनारमा ३ दर्जन गमला विरुवा रोपिएका हुन् । ती विरुवाहरु सडक र सहरको सौन्दर्यता प्रदान गर्ने प्रजातिका रहेको वैङ्कका प्रबन्धक मनोज शर्माले बताए । बैङ्कले हरेक बर्ष यस्तै सामाजिक तथा मानवीय कार्य गर्दै आइरहेको शर्माको भनाई छ । विरुवासंगै सिंचाई गर्ने हजारी पनि वितरण गरिएको शर्माले बताए । गमलामा पैसा बचत गर्ने लगायतका सन्देश लेखिएका छन् ।

बैङ्कले प्रदान गरेका विरुवाले आफ्नो वडाको सौन्दर्य बढाउन ठुलो योगदान दिएको भन्दै वडा अध्यक्ष गिरीले धन्यबाद दिए । उनले अब यी विरुवाको हुर्काउने र बढाउने जिम्मा पनि वडाले लिने बताए । वनगाईलाई वाणगंगाकै सुन्दर सहर बनाउने योजना आफ्नो रहेको उनले बताए । विरुवा ग्रहण गर्ने क्रममा वडा अध्यक्ष गिरी गमक्क परेका थिए ।

कार्यक्रममा स्थानीय समाजसेवी शिवचन्द्र आचार्य, ठाकुर प्रसाद पौडेल, उदयमान कुँवर, दामोदर आचार्य, स्थानीय शान्ति सृजना युवा क्लवका पूर्व अध्यक्षद्धय मान बहादुर कार्की, युग बहादुर केसी, बैङ्कका कर्मचारीको सहभागिता थियो । शान्ति सिर्जना क्लवमा आवद्ध दिदीबहिनीको धेरै ठुलो भूमिकामा वृक्षरोपण सम्पन्न भएको समाजसेवी कुशल पौडेलले अपि टाइम्सलाई बताए ।