चन्द्रकान्त न्यौपाने

काठमाडौँ । निर्माण रोकिएर दुई बर्षदेखि अलपत्र अवस्थामा रहेको चितवनस्थित गौतम बुद्ध अन्र्तराष्ट्रिय क्रिकेट रंगशाला निर्माण कार्यान्वयनमा खेलकुद सचिव नै बाधक देखिएका छन् ।

रकम अभाव भएर अलपत्र अवस्थामा रहेको उक्त रंगशालासरकारले बनाउने गरी मन्त्रीपरिषद्ले निर्णय गरेको अवस्थामा खेलकुद मन्त्रालयका सचिव सूर्य प्रसाद गौतम बाधक देखिएका हुन् ।

श्रोतका अनुसार उनले यो रंगशाला सरकारले बनाउन नहुने भनाई राखेका छन् । सरकारले गरेको निर्णय आफूले नमान्ने उनको अडान छ ।

श्रोत भन्छ, ‘धुर्मुस–सुन्तली फाण्डेसनले बनाउन सुरु गरेको रंगशाला रकम अभावले रोकिएको छ । धुर्मुस–सुन्तलीको क्रण तिरेर सरकारले बनाउने निर्णय गरेको अवस्थामा उहाँले अनाहकमा आनाकानी गरिरहनु भएको छ । जुन गर्न हुँदैनथ्यो ।’

खेलकुद सचिवले निर्णय मान्न अटेर गरेपछि सरकारले स्पष्टिकरण सोध्ने भएको छ । चाँडै उनीमाथि स्पष्टिकरण सोधिने बताइएको छ । कानुनतहः सरकारले गरेको निर्णय कर्मचारीले मान्नै पर्ने हुन्छ ।

श्रोत थप्छ, ‘सचिव सूर्य प्रसाद गौतम सरकरको निर्णयभन्दा माथि हुन खोज्नुभएको छ । यसले उहाँलाई राम्रो गर्दैन । रंगशाला बनाउन गौतम किन अनुदार भएका हुन् अझैसम्म केहि पनि खुलेको छैन ।

३ अर्ब ५५ करोड लागत अनुमान गरिएको रंगशालाको ३५ प्रतिशत काम सकिँदा ५४ करोड खर्च भइसकेको छ भने ऋण नै १६ करोड पुगेको छ । यसपछि आफूहरुले नसक्ने भन्दै धुर्मुस–सुन्तलीले काम रोकेका छन् । उनीहरुले सरकारले आफूहरुले तिर्नुपर्ने क्रण तिरेर बनाए सबै स्वामित्व सरकारलाई हस्तान्तरण गर्न तयार रहेको बताउँदै आएका छन् । भरतपुर महानगरले पनि रंगशाला सरकारले बनाउने बताउँदै आइरहेको अवस्था छ ।

बजेटमार्फत् सरकारले किर्तिपुरस्थित टियू क्रिकेट स्टेडियम र मुलपानीलाई अन्र्तराष्ट्रिय स्तरको बनाउने बताएको छ । तर बजेटमा भने चितवनको रंगशालालाई सम्बोधन गरिएको छैन । प्रधानमन्त्री भारत भ्रमणमा रहेको बखत गौतमबुद्ध क्रिकेट रंगशाला बनाउन भारत इच्छुक रहेको समाचार पनि बाहिर आएको थियो ।

तीन हजार दर्शक क्षमता भएको प्यारापिटका २ सय ८६ वटा पिलर उठाइएको छ । चौरमा दुबो गोड्ने काम भइरहेको छ । चौरको काम ९५ प्रतिशत सकिएको छ । प्यारापिट तयार भएर भीआईपी टावर बनाउन थालिएको छ । टावर ‘वान’ को पिलर उठाइसकेर बिम ढलान हुँदै छ । ८ वटा पिच बन्न बाँकी छन् । तर पछिल्लो २ बर्ष निर्माण नहुँदा रंगशाला भत्कन थालेको छ । कतिपय खेल भएको पीच पनि घाँस उम्रेर बिग्रन थालेकोमा धुर्मुुस सुन्तली चिन्तित छन् । यसलाई थप क्षतिबाट रोक्न सरकारले चाँडै अग्रससरता लिनुपर्ने उनीहरुको भनाई छ ।

नेपाल अहिले एसिया कपमा छनोट भइसकेको छ भने विश्व क्रिकेटको क्वालिफायरमा पुगिसकेको छ । त्यहि क्वालिफायरको लागि नेपाली टिम अभ्यास खेल्न अहिले दक्षिण अफ्रिका छ ।

यो अभ्यासपछि नेपालले जिम्बाबेमा क्वालिफायर खेल्ने छ । पछिल्लो समय नेपाली क्रिकेटमा हासिल भएको उपलब्धिको कारण चाँडै अन्र्तराष्ट्रिय क्रिकेट मैदान बनाउन सरोकारवालाको सरकारलाई दबाब छ । रोकिएको चितवनको रंगशाला समयमा बनाएमा नेपालमा नै चाँडै ठुला ठुला अन्र्तराष्ट्रिय खेल खेलाउन सक्नेमा धेरै खेलप्रेमी र सरोकारवाला छन् ।