काठमाडौँ । राष्ट्रिय स्वतन्त्र पार्टीका सभापति रवि लामिछानेले आफ्ना २१ जना सांसद संसदमा पर्याप्त रहेको बताएका छन् । पार्टी खोलेको ६ महिनामै जनताले विश्वास गरेर आफूहरुलाई पठाएको हुनाले यो संख्या सदनमा पर्याप्त रहेको उनले बताए ।

अर्घाखाँची–काठमाण्डौँ सम्पर्क भेलाको शनिबार काठमाण्डौँमा सम्बोधन गर्दै सभापति लामिछानेले भने, ‘जनताले हामी जति जनालाई संसदमा पठाउनु भएको छ, यो पर्याप्त छ ।’

हामी संसदमा कुनै पनि भ्रष्टाचार लगायतका गलत गतिविधि हुन दिन्नौँ । हाम्रा २१ जना सांसद संसदका बाहुबली हौँ । अहिले आफूहरुमाथि चौतर्फी घेराबन्दीमा पारिएको भन्दै त्यसलाई तोडेर अघि बढ्ने उनले बताए । हरेक क्षेत्रमा खारिएर आएका हुनाले सबै सांसदको भूमिका प्रभावशाली रहेको उनको दावी छ ।

आफूहरु मिसन २०८४ मा लागेकाले ढुक्क भएर पार्टीमा लाग्न उनको अनुरोध छ । कार्यक्रममा सांसद स्वर्णिम वाग्लेले पनि सम्बोधन गरेको कार्यक्रममा रास्वपाका केन्द्रिय सदस्य अर्जुन अधिकारी, अर्घाखाँची संयोजक हरि भुसाल, अभियान्ता डाक्टर निकोलस भुसाल लगायतले बोलेका थिए । कार्यक्रमको संचालन जनक भुसालले गरेका थिए ।