काठमाडौँ । राष्ट्रिय स्वतन्त्र पार्टीका केन्द्रिय सदस्य तथा सांसद स्वर्णिम वाग्लेले उप चुनाव भइहाले अर्घाखाँचीमा राष्ट्रिय स्वतन्त्र पार्टी उदाउने बताएका छन् ।

अर्घाखाँची–काठमाण्डौँ सम्पर्क भेलाको शनिबार काठमाण्डौँमा बोल्दै सांसद वाग्लेले अर्घाखाँचीमा रास्वपालाई कसैले रोक्न नसक्ने दावी गरे ।

६ महिनाको अन्तरमा सभापति रवि लामिछानेले पार्टीलाई राष्ट्रिय रुपमा बलियो पार्टी बनाएको हुनाले अब पार्टी अघि बढिसकेको उनको भनाई छ ।

उनले भने, ‘२० जना सांसद लिएर अघि बढेको पार्टीले तनहुँमा मलाई उठाएर सानदार जित हासिल गर्यौँ । जनताले अपार आशा दर्शाएका छन् । यदि अर्घाखँचीमा उप चुनाव भइहाल्यो भने हामीले जित्ने ग्यारेन्टी छ । त्यहाँ हामीले ऐतिहासिक जित हासिल गर्न सक्छौँ । तपाईहरु ढुक्क भएर लाग्नु पर्यो ।’

प्रतिनिधि सभामा एक मात्र सिट रहेको अर्घाखाँचीमा गत चुनावमा नेकपा एमालेका सचिव टोप बहादुर रायमाझीले जितेका थिए । नक्कली भुटानी शणरार्थी प्रकरणमा उनी मुछिएको हुनाले अदालतले दोषी ठहर्याएमा एक बर्षभित्र उप चुनावको सम्भावना छ ।
धेरै नबोली बोल्ने समय सभापति लामिछानेलाई छाडेका वाग्लेले अबको मुलुक विकासको विकल्पको रुपमा रास्वपा नै रहेको दावी गरे । अब ढुक्क भएर रास्वपा विस्तारको अभियानमा लाग्न उनले सुझाएका थिए ।

कार्यक्रममा रास्वपा उप सभापति डिपी अर्याल, केन्द्रिय सदस्य अर्जुन अधिकारी, अर्घाखाँची संयोजक हरि भुसाल, अभियान्ता डाक्टर निकोलस भुसाल लगायतले बोलेका थिए । कार्यक्रमको संचालन जनक भुसालले गरेका थिए ।