काठमाडौँ । कपिलवस्तुका पत्रकार थानेश्वर अधिकारीलाई मलेसियामा ‘पत्रकारिता सम्मान’ प्रदान गरिएको छ ।

प्रियसी म्युजिक प्रालीले आयोजना गरेको ‘दोश्रो सिल्भर इन्टरनेश्नल म्युजिक अवार्ड २०२३’ को अवसरमा अधिकारीलाई पत्रकारिता सम्मान दिइएको हो ।

नेपालको पत्रकारिताको माध्यमबाट चलचित्र, गीतसंगित, कला र मनोरञ्जनको क्षेत्रमा दिएको योगदानको कदर गर्दै सम्मान दिइएको कार्यक्रमका निर्देशक राजेन्द्र पुरीले बताए । मलेसियास्थित नेपाली राजदूत डिल्लीराज पौडेल लगायतले अधिकारीलाई सम्मान प्रदान गरेका थिए ।

अधिकारी कपिलवस्तुको वाणगंगास्थित रेडियो मायादेवीका कार्यकारी निर्देशक छन् भने लुम्बिनी दर्पण साप्ताहिक लगायतका संचारमाध्यममा आवद्ध छन् ।