काठमाडौँ । नेपाल पत्रकार महासंघ लुम्बिनी प्रदेशको पहलमा लुम्बिनी प्रदेशका क्रियासील एक हजार ६२ जना पत्रकारको सामुहिक दुर्घटना विमा गरिएको छ ।

लुम्बिनी प्रदेश सरकारको सहकार्यमा एक हजार ६२ जना पत्रकारको, एक पत्रकार बराबर ६ लाख २५ हजार रुपैयाँको दुर्घटना विमा गरिएको महासंघका प्रदेश महासचिव बिक्रम खड्काले बताए ।
पत्रकारको दुर्घटना विमाका लागि आन्तरिक मामिला कानुन तथा सहकारी मन्त्रालयका शाखा अधिकृत तुल्सीराम पौडेल, राष्ट्रिय विमा कम्पनी भैरहवाका शाखा प्रमुख सुशील पाण्डे र नेपाल पत्रकार महासंघका लुम्बिनी प्रदेश अध्यक्ष बसन्त गिरीले सम्झौता पत्रमा हस्ताक्षर गरेका थिए ।

अध्यक्ष गिरीले पत्रकारको पेशा जोखिमपूर्ण रहेको हुँदा प्रदेश सरकारसंग यस विषयमा बारम्बार कोसिस भइरहेको बताए । उनका अनुसार सक्रिय र महासंघमा आवद्ध पत्रकारले यो सुविधा पाउने छन् । आफूहरुको कार्यकालमा स्थानीय र प्रदेश सरकारसंग समन्वय गरेर पत्रकारको हकहितमा काम गर्ने अध्यक्ष गिरीको दावी छ ।

दुर्घटना विमाबाट पत्रकारको दुर्घटनामा मृत्यु भएमा, स्थायी तथा अस्थायी अंगभंग भएमा औसधि उपचार तथा आतंकवादबाट हुने जोखिमको रक्षावरण गर्नेछ ।
पत्रकारको दुर्घटना विमा गर्न आगामी बर्षको लागि पनि बजेट विनियोजन गरिएको आन्तरिक मामिला कानुन तथा सहकारी मन्त्रालयका सचिव लालबाबु कवारीले जानकारी दिए । यो सुविधापछि धेरै पत्रकार खुसी भएका छन् ।