काठमाडौँ । कपिलवस्तुको वाणगंगा नगरपालिकाका एक वडा अध्यक्ष थुनामा परेका छन् । नगरपालिकाको वडा नम्बर १० का वडा अध्यक्ष यमप्रसाद पोख्रेल शुक्रबार डिभिजन वन कार्यालय कपिलवस्तुको नियन्त्रणमा परेका हुन् ।

अहिले उनलाई कार्यालयको थुनुवा कक्षमा राखिएको छ । यही विषयलार्ई लिएर नगरपालिकाले १३ औँ नगरसभा स्थगित गरेको छ । आर्थिक बर्ष २०८० । ८१ को बजेट प्रस्तुत गर्न डाकिएको नगर सभा स्थगित भएको हो ।

वडा अधयक्ष पोख्रेललाई वन कार्यालयले नियन्त्रणमा लिएपछि वडा नम्बर २ का वडा अध्यक्ष विष्णु पौडेलले नगर सभा स्थगितको माग गरेका थिए । वन कार्यालयले सुकुम्बासीको नाममा जग्गा अतिक्रमणमा संलग्न भएको आरोपमा पोख्रेललाई नियन्त्रणमा लिएको हो ।

स्थानीय शासन संचालन ऐनको धारालाई टेक्दै नगर प्रमुख तथा सभा अध्यक्ष चक्रपाणी अर्यालले सभा स्थगित गरेका हुन् ।