एजेन्सी । भारतमा मनसुनजन्य विपद्का कारण एकै दिन कम्तीमा २४ जनाको ज्यान गएको छ । विपद्का कारण कैयौँ मानिस हराइरहेका छन् ।

ज्यान गुमाउनेमध्ये नौ जनाको मन्दिर भत्किँदा ज्यान गएको बीबीसी हिन्दीले जनाएको छ । मन्दिर भत्किएको घटनामा थुप्रै मानिस हराइरहेका छन् । सबैभन्दा बढी प्रभावित राज्य हिमाञ्चल प्रदेशका मुख्यमन्त्री सुखविन्दर सिंह सुखुले पछिल्लो २४ घण्टामा कम्तीमा १६ जनाको मज्यान गएको बताउनुभएको छ ।

केही दिनदेखिको मुसलधारे वर्षाका कारण उत्तरी राज्य उत्तराखण्ड र हिमाञ्चल प्रदेशमा भवन, सडक तथा पुलहरू भत्किएका छन् । उत्तराखण्ड राज्यमा पनि पहिरो जाँदा मानिसहरू पुरिएको आशङ्कामा उद्धार टोलीहरू भग्नावशेष हटाउन खटिरहेका छन् । उत्तराखण्डमा हिजो र आज गरी कम्तीमा आठ जनाको ज्यान गएको छ ।

मनसुनले दक्षिण एसियामा वार्षिक वर्षाको झन्डै ८० प्रतिशत वर्षा ल्याउँछ र यो कृषि र लाखौँको जीविकोपार्जनका लागि महत्त्वपूर्ण छ । तर यसले हरेक वर्ष पहिरो र बाढीको रूपमा विनाश पनि ल्याउँछ ।