चन्द्रकान्त न्यौपाने
काठमाडौँ । पसलमा आउने जो कोहिलाई ‘मुसुक्क’ हाँसेर न्यानो स्वागत गर्ने उनको मुख्य विशेषता हो । त्यसपछि मिठो बोल्छन् । भलाकुसारी गरिहाल्छन् । सुखदुख, सञ्चोविसन्चो पनि सोधिहाल्छन् । व्यवसायमा मात्र होइन अन्य स्थितिमा पनि उनको स्वभाव यस्तै हो । आफूमा भएको यहि विशेषताका कारण उनी आज सफल ब्यापारीको परिचय बनाउन सफल बनेका छन् । उनी अर्थात् ‘रामु भुसाल’ ।

कपिलवस्तुको वाणगंगा नगरपालिका वडा नम्बर ४ जितपुरमा भुसाल साडी हाउस संचालन गरिरहेका गहुँ गोरो वर्णका भुसाल वडा नम्बर १ उत्तमनगरका स्थायी बासिन्दा हुन् । उनै भुसालले खोलेको भुसाल साडी अहिले पश्चिम नेपालमै ब्राण्ड बनेको छ । पसलले अहिले कपिलवस्तुसहित बुटवल, अर्घाखाँची, दाङ, गुल्मीसम्मका प्रशस्त ग्राहक बनाएको छ भने साडी, कुर्ता सलवार र सटिङक सुटिङ, विवाहका कपडा खरिद गर्न भारतका सुनौली, खुनुवा धाउनुपर्ने ग्राहकको बाध्यता भुसाल साडीले एक प्रकारले टारेको छ नै भन्दा हुन्छ ।

भुसालले कहिल्यै सपना देखेका थिएनन् कि साडीको ब्यापारमा दुख पोख्दा यति माथि उठ्न सक्छु भनेर । साडीमा गरेको दुखले उनले नपत्याएको सफलता हासिल गरेका छन् भन्दा अत्युक्ति हुँदैन । सुरुमा साडी पसलमा जागिरे, त्यसपछि आफ्नै पसल । अहिले त्यहि पसलबाट भुसालको आफ्नै घर, घडेरी र बैङ्क ब्यालेन्स छ । भुसाल वाणगंगामा सफल ब्यापारीका रुपमा चिनिन्छन् ।

साडीमा गरेको दुखले दिएको सफलताका कुरा गर्ने क्रममा उनले आफ्नो जागिरे जीवनलाई सम्झिए । करिब १० बर्ष बुटवलको रजनी इम्पोरियममा काम गरेको उनले सुनाए । उनी भन्छन् ‘सुरुमा रजनी इम्पोरियममा काम गर्न सुरु गरेँ । सुरुको ३ महिना भोलेन्टियर नै काम गरेँ । साडी पसलको ब्यापारबारे मलाई केहि पनि थाहा थिएन । काम गर्न पनि त्यहाँ छनौटको प्रकृया थियो । २२ जनाबाट म पनि ३ जनामा छनौट भएँ । अनि सुरु भयो जागिरे जीवन ।’

उनले थपे, ‘मेरो अहिलेको सफलतामा मेरो फुपाजुको योगदान छ । रजनीमा पाइला टेकाउन उहाँको भूमिका छ । त्यसपछि मैले इमान्दारपूर्वक काम गरिरहेँ । ३ महिना ट्रयाल पनि पास भएँ । आफ्नो इमान्दारिता र मुसुक्क हाँस्ने गुँणले गर्दा रजनी इम्पोरियममा पनि धेरै ग्राहकको विशवास जितेँ । त्यहि विश्वासको कारण मलाई इम्पोरियमले भारतको बनारस, दिल्ली, कोलकत्ता अहमदाबाद लगायतमा १५ । २० दिनसम्मको लामो भ्रमणको मौका पनि दियो । भ्रमण गर्दा बिभिन्न साडी आइटमहरुको लागि पर्चेजको मौका पनि पाएँ । कम्पनीहरु चिनेँ । अंकलसंग हिँड्ने गर्दा धेरै कुराहरु सिकेँ । सेल्स सिकेँ । डिलिङ सिकेँ । मिहिनतेको साथ काम गरेँ ।’

यो सिकाउनमा रजनीका महेश्वर श्रेष्ठ र पुरन श्रेष्ठको ठुलो हात रहेको पनि उनी बताउँछन् । उहाँहरु आफ्नो असल अभिभावक रहेको उनले बताए ।

सुरुमा तलब धेरै नभए पनि सिक्नको लागि आफूले मिहिनेत गरेको भुसाल बताउँछन् । ‘जागिर होओस् या अरु केहि सफलताको लागि के पाएँ भन्दा के दिएँ भनेर काम गर्दा नतिजा आउँछ भने कुरा मैले नै भोगेको कुरा हो । सुरुमा मेरो पनि तलब धेरै थिएन । कम्पनीको लागि आफूले दिनुपर्ने दिइरहँ । जागिरको पैसाल नपुग्ने भएपछि एउटा पसल खोल्नुपर्छ भन्ने लागिरहेको थियो । कहाँ खोलौँ पनि लागिरहेको थियो । बभिन्न ठाउँहरु पनि हेरेँ । अनि रोजेँ आफ्नै ठाउँ र ठुलै चुनौतिकाबिच २०६७ सालमा चार नम्बरमा खोलेँ । भुसाल साडी हाउस, उनले अपि टाइम्सलाई सुनाए ।

पसलकोे सुरुवात पछाडी उनले रोचक कुरा सुनाए । उनले भने ‘रजनीमा कपिलवस्तु र विशेष गरी वाणगंगा क्षेत्रका ग्राहक धेरै आउने गर्नुहुन्थ्यो । धेरै संख्यामा बुटवल धाउने गरेको, बुटवल धाउँदा उहाँहरुको समय र पैसा खेर गइरहेकोको कु्राले मन बिझाइरहेको थियो । त्यसपछि पसलको सोँच आउँदै थियो । यो सोँच आउनासाथ धेरै समय जागिरे भइनँ । त्यसपछि चार नम्बरमा भुसाल साडी खोलेँ । यति कस्टमर भए त सुविधा दिएर राम्रो गर्छु भन्ने उतिखेरै लागेको थियो,अहिले सोँचेजस्तै भयो । धेरैले माया गरिरहनुभएको छ।’

आफ्नो सफलताको सबै श्रेय परिवारभन्दा पनि ग्राहक र साहुको विश्वास रहेको सुनाउँछन् । ‘मैले जे जति गरेको छु । धेरै नै गरेँ भन्ने लाग्दैन । तर ग्राहकको विश्वास जितेको छु । लुम्बिनी प्रदेशका बिभिन्न जिल्लाबाट भुसाल साडी खोज्दै ग्राहक आउनुहुन्छ । यहाँको सामान मन पर्छ गुणस्तरीय छन् भन्न्ुहुन्छ । ग्राहकको खुसी नै मेरो खुसी हो । यो खुसी र सफलतामा श्रीमती निरा भुसालको पनि ठुलो हात छ, उनी भन्छन् ।’

आफू कहाँ सबै भेराइटी र प्रकारका साडी, कुर्तासलवार, सटिङ सुटिङ, लेडिज कपडा, मर्दापर्दा चाहिने कपडा, ग्यारेन्टी गहना, बालबच्चाका गुणस्तरीय सामानहरु सुपथ मुल्यमा पाइने भुसालले बताए । साडी र ग्यारेन्टेड गहनाका दुई छुट्टाछुट्टै पसल रहेको उनले जानकारी दिए ।

पसलमा अहिले ५ जनाभन्दा बढीलाई प्रत्यक्ष रुपमा रोजगारी दिएको भुसालले बताए । ग्यारेन्टेड गहना पसल दाइले संचालन गरिरहेको सुनाउँदै आफ्नो सफलताको श्रेयमा उहाँको पनि हात रहेको उनले सुनाए । मुख्यगरी चाडबाडमा धेरै ग्राहकको भीँड लाग्ने उनले बताए । अहिले तीज, दशैँ लगायतका पर्व नजिकिँदै गरेकाले विशेष छुटमा साडीहरु उपलब्ध रहेको बताउँदै भुसालले मौकाको फाइदा लिन अनुरोध गरे ।

भुसाल साडी सुरु गर्दा आफूसंग पैसा नरेहेको उनी बताउँछन् । जागिरमा तलब धेरै थिएन । घर बाउआमाबाट पनि मैले एक सुको लिएको होइन । सुरुको आर्थिक अवस्था पनि त्यति राम्रो थिएन । तै पनि आँट गरेँ । त्यहि आँट अहिलेको सफलताको कडी बनेको छ ।

यो सफलताको कुरा गर्दा रामु विगत सम्झिएर भक्कानिए । उनले भने ‘हाम्रो इतिहास नाजुक थियो । बुबा आमाले निकै दुख गर्नुभयो । मेरो जन्म पनि भारतको सिलङ, आसाममा भएको हो । कुरो कुरा म चार बर्ष रहँदाको हो । त्यहाँ एउटा द्धन्द्ध भयो । आमाबुबाले भात पकाउँदै हुनुहुन्थ्यो । एक्कासी द्धन्द्ध भएपछि कसौँडीको भात पनि छोडेर बुबा भाग्नुभएको थियो । कसौँडीको भात पनि पस्केर खान पाएनौँ । त्यसपछि नेपाल आएर बाबाले मजदुरी गरेर हामीलाई पाल्नुभयो । त्यो सम्झँदा अचम्म लाग्छ । अहिले बुबाआमा मैले गरेको प्रगति देखेर खुसी हुनुहुन्छ । यस्तो पनि हुने रहेछ भनेर बुबाले कहिलेकाहिँ अनुभव सुनाउनुहुन्छ ।

कोरोनाको समयमा समस्या भए पनि अहिले विस्तारै ठिक हुँदै गएको उनले बताए । उनको बुझाई छ चार नम्बरमा ब्यापारमा समस्या छ । यहाँको बजार ठुलो देखिए पनि धेरै ब्यापारी समस्यामा छन् । यसको कारण खोज्न जरुरी छ । नगरपालिका, उद्योग वाणिज्य संघहरुले यो विषयलाई गम्भिर रुपमा लिनुपर्दछ ।

भुसालका परिवारमा आमा धनमाया भुसाल, बुबा लोकनाथ भुसाल, छोरीहरु नितु, निर्जु र छोरा नितेश भुसाल छन् । यहि ब्यापारबाट भुसालले छोराछोरीलाई राम्रो शिक्षादिक्षा दिन सकेका छन् । अब साडीमै जिन्दगी विताउने सोच रहेको उनले सुनाए । राम्रोसंग गर्न सके कपडाको पसलमा राम्रो भविष्य रहेको भन्दै केहि सिक्न आउन खोज्नेलाई सहयोग गर्ने पनि उनले बताए ।