काठमाडौँ । गत बर्ष असोज १५ गते कपिलवस्तुमा नेपालमै अहिलेसम्म नभएको एउटा प्रतियोगिता सम्पन्न भयो । त्यो थियो ‘साइकल प्लाङक ब्यालेन्स प्रतियोगिता-२०२२’। जुन पानीमाथि ट्रयाक बनाएर साइकलको माध्यमबाट खेल्ने गरिन्छ ।

नेपाल बाहिर पनि सिमिति देशहरुमा हुने प्रतियोगिता पहिलोपटक लायन्स क्लव अफ कपिलवस्तुले वाणगंगा नगरपालिकामा आयोजना गरेको थियो । आयोजकले कस्तो हुन्छ भनेर ट्यालको रुपमा प्रतियोगिताको पहिलो संस्करण गरेको थियो । तर प्रतियोगिताले यसरी धमाका मच्याइदियो स्थानीय, केन्द्रदेखि अन्र्तराष्ट्रिय जगत्सम्म खेलको चर्चा भयो ।

सामाजिक संजाल (फेसबुक, टिकटक, युटुभ) मा यो खेलका क्लिप्स भाइरहल नै भए । टिकटकमा जजसले यस प्रतियोगिताका सर्ट भिडिओ राखे ती मिलियन भ्यूअर्सको क्लवमा पुगे । कहाँसम्म भने टिकटकले अनुमति मागेर आफ्नो बढी रुचाइएको भिडिओको सुचिमा यस खेलका विजेता शुशान्त थापाको भिडिओ पनि समावेश गर्यो । केन्द्रसम्मका मिडियामा यस खेलको हेडलाइन बन्यो । प्रतियोगिताकै कारण क्लवले डिष्ट्रिकमा सर्वोत्कृष्ट क्लवको उपाधि पायो ।

सर्वसाधारण र साइकलप्रेमीले यस खेललाई बढी रुचाए । त्यहि चर्चा र सर्वसाधारणको मायाका कारण यस बर्ष पनि क्लवले प्रतियोगिताको दोश्रो संस्करण गर्ने भएको छ ।

क्लवले शुक्रबार पत्रकार सम्मेलन गरी दशैँ, तिहार र छठ पर्वको अवसर पारी असोज २७ गते प्रतियोगिता गर्ने जनाएको हो । पहिले भएकै स्थान वाणगंगा नगरपालिका वडा नम्बर ३ मा रहेको राजापानी सामुदायिक वनको पोखरीमै खेल हुने छ । वाणगंगा नगरपालिका र समग्र कपिलवस्तुको पर्यटन प्रवद्धन गर्ने प्रतियोगिताको लक्ष्य छ ।

गत बर्ष एक हप्ताको छोटो तयारीमा प्रतियोगिता संचालन गरिएकाले यसपटक अझै नयाँ पन दिने गरी तयारी गरिएको आयोजक लायन्स क्लव अफ कपिलवस्तुका अध्यक्ष ओमप्रकाश घिमिरेको भनाई छ । प्रतियोगिताको संयोजक र सदस्य पनि तोकिइसकिएको अध्यक्ष घिमिरेले बताए । अध्यक्ष घिमिरेले भने, ‘गत बर्षको प्रतियोगितालाई सफल बनाउन खेल संयोजक विष्णु घिमिरेले ठुलो भूमिका खेल्नुभएको थियो । यसपटक पनि क्लवले उहाँलाई नै संयोजक तोकेको छ । साथमा हामी लियो र लायन्सका पदाधिकारी सदस्य पनि छौँ । प्रतियोगितालाई जतिसक्दो राम्रो बनाउने तयारी छ ।’

संयोजकको जिम्मेवारी पाएका घिमिरेले यसपटक खेललाई अझै रोमाञ्चक बनाउने प्रयासस्वरुप तयारी सुरु भइसकेको अपि टाइम्सलाई बताए । यसपटक सहभागिको संख्या पनि बढि हुने र ट्याकमा पनि केहि नयाँपन दिनेगरी काम सुरु भएको संयोजक घिमिरेको भनाई छ ।

घिमिरे भन्छन् ‘गत बर्ष छोटो समयको तयारी थियो । प्रचारप्रसार पनि तयति थिएन । धेरैलाई खेलबारे थाहा नै थिएन । हामीले पनि धेरै कुराहरु सिक्यौँ । अब हामी नयाँ छैनौँ । यसपटक अझै बढी प्रचारप्रसार गरी धेरैलाई सहभागि गराउने गरी तयारी गरेका छौँ । ट्याक पनि अलिकति चेञ्ज हुनेछ ।’

संयोजक घिमिरेका अनुसार यसपटक विदेशबाट पनि सहभागि गराउने गरी तयारी छ । उनले थपे ‘नेपालका बिभिन्न स्थानबाट साइकल राइडर र इच्छुक त आइहाल्नुहुन्छ नै भारतबाट पनि केहि साइकबल राइडरलाई सहभागि गराउने प्रयास भइरहेको छ । हेरौँ अन्तिमसम्म कति सफल हुन्छौँ ।’

खेलमा भाग लिनको लागि क्लवले अनलाइन आवेदन खुलाईसकेको छ । सम्पूर्ण सुरक्षा प्रबन्ध गरिएकाले ढुक्क भएर प्रतियोगितामा सहभागि हुन क्लवले अपिल गरेको छ । भाग लिनेको सुरक्षाको लागि नेपाल प्रहरी, जनपथ र सशस्त्र प्रहरीले नै सुरक्षा प्रदान गर्नेछन् । प्राथमिक उपचारदेखि एम्बुलेन्सको समेत व्यवस्था गरिएको संयोजक घिमिरेले बताए ।

प्रतियोगितामा विजयी हुनेले नगद पचास हजार तथा द्धितीयले २५, तृतीयले प्रन्ध र सान्त्वना हुनेले गिफ्ट हेम्पर सहित मायाको चिनो र प्रमाण पत्र प्रदान गरिने संयोजक विष्णु घिमिरेले बताएका छन् । प्रतियोगितामा विजयी हुनेले नगद पचास हजार र द्धितीय हुनेले पच्चिस, तृतीय हुनेले प्रन्ध र सान्त्वना स्थान हासिल गर्नेले आकर्षक उपहार पाउने बताइएको छ ।