कपिलवस्तु । बाणगंगा नगरपालिकाकी एक महिलाले करिब एक करोड रुपैयाँ उठाएर फरार भएकी छन् । वडा नं ४ मा फेन्सी पसल संचालन गरेकी रोमा घिमिरे नाम गरेकी महिलाले स्थानीय व्यवसायी, सर्वसाधारण र आफन्तसंग करिब १ करोड रुपैयाँ लिएर फरार भएकी हुन् ।

उनले गजेहडामा केसी फेन्सी सञ्चालन गर्दै आएकी पीडितहरुले बताएका छन् । लामो प्रयास गर्दा पनि पैसा असुल गर्न नसकेपछि पीडितहरु सम्पर्कमा आउन थालेका छन् । मिडियासंग सम्पर्कमा आएकाहरुले आफू कहाँबाट लगेको हिसाब नै बताएका छन् । ठगिनेमा अधिकांस महिला छन् ।

तीमध्ये नेत्र कुमारी खत्रीको १९ लाख, फेन्सी पसल राखिएको घरबेटी बिष्णु कुवंरको १५ लाख, चन्द्र भण्डारीको ८ लाख, बुलु मल्लको ९ लाख, माया खत्रीको ६ लाख, पबित्रा गिरीको ६ लाख, उमेश रसाईलीको ५० हजार, लक्ष्मी भण्डारीको १ लाख ५० हजार, माया खत्रीको ५ लाख, यमकला कुवंरको १ लाख, मसिना कुवंरको ३ लाख, ईश्वर कुवंरको ३ लाख, डिल बहादुर कुवंरको ४ लाख, बसन्ती नेपालीको २ लाख, लिला रानाको १ लाख ५० हजार, सुन्तली नेपालीको १ लाख ५० हजार, उजेली कुवंरको १ लाख ५० हजार रुपैयाँ संकलन गरेर ती महिला अहिले सम्पर्कमा छैनिन् । यी पीडितको जम्मा रकम जोड्दा ८८ लाख हुन आउँछ ।

सापटी लिएकाहरुलाई ती ठग महिलाले पटक पटक चेक दिने गरे पनि खाता खाली रहेको पीडितहरु बताउँछन् । यसको प्रमाण लुम्बिनी विकास बैंकमा रहेको पीडितहरुले बताएका छन् ।

पहिले सम्पर्क भए पनि अहिले भने सम्पर्क हुन छाडेकाले आवश्यक खोजि गरिदिन प्रहरीलाई समेत आग्रह गरेका छन् । अब प्रहरीकहाँ गएर उजुरी दिने तयारीमा रहेको उनीहरु बताउँछन् ।

पछिल्लो समय सम्पर्कविहिन भएकी उनी रुपन्देही, अर्घाखाँची, भारत लुक्ने गरेको खुल्न आएको छ । पिडितहरुका अनुसार ती महिला विदेश जाने सुरमा रहेकी छन् । उनी विदेश लुक्न जाने भन्ने सुचनाको आधारमा उनलाई भाग्नबाट रोक्नको लागि मिडियामा आउनु परेको पीडितहरु बताउँछन् । ती महिलाले अरु धेरैको पैसा ठगेको हुन सक्ने पीडितहरु बताउँछन् ।यस खबरलाई स्थानीय लुम्बिनी दर्पण अनलाइनले पनि लेखेको छ ।