एजेन्सी । एकदिवसिय अन्तराष्ट्रिय ‘ओडिआई’ विश्व वरियतामा शीर्ष स्थानमा रहेको भारतले ३ खेलको ओडिआई सिरिजअन्तर्गत दोस्रो खेलमा पनि अष्ट्रेलियालाई पराजित गर्दै एक खेल अगावै सिरिज जितेको छ ।

आसन्न एकदिवसिय विश्वकपको तयारीका रुपमा खेलिएको सिरिजमा विश्व वरियताको तेस्रो स्थानमा रहेको अष्ट्रेलियामाथि डिएलएस पद्दतिमार्फत ९९ रनको विशाल जित निकाल्दै भारतले एक खेल अगावै सिरिज जितेको हो ।

यसअघि पहिलो खेलमा भारतले अष्ट्रेलियालाई ५ विकेटले पराजित गरेको थियो ।

भारतको मध्य प्रदेशस्थित होल्कर रंगशालामा भएको खेल केहि बेर वर्षाले प्रभावित भएपछि खेललाई डिएलएस पद्दतिमार्फत ३३ ओभरमा झारिएको थियो ।

जसअनुसार अष्ट्रेलियाले ४०० रनको सट्टा ३१७ रनको नयाँ विजयी लक्ष्य पायो ।

नयाँ लक्ष्यका साथ मैदान उत्रिएको अष्ट्रेलिया २८।२ ओभरमा अलआउट हुँदा मात्र २१७ रनमा समेतियो ।

अष्ट्रेलियाका लागि डेभिड वार्नरले ३९ बलमा ७ चौका र १ छक्का प्रहार गर्दै ५३ रनको अर्धशतकिय पारी खेल्दा सिन एब्बोटले ३६ बलमा ४ चौका र ५ छक्का प्रहार गर्दै ५४ रनको अर्धशतकिय पारी खेले ।

यता, मार्नुस लाबुसचाङ्नेले ३१ बल खेल्दै ४ चौका प्रहार गरेर २७ रन जोड्दै पेविलियन फर्किदा जोश हाज्लेउडले १६ बलमा २ चौका र २ छक्का प्रहार गर्दै २३ रन जोड्दै आउट भए ।

त्यस्तै, क्यामरन ग्रिनले १३ बलमा १ चौका र १ छक्का प्रहार गर्दै १९ रन जोड्नेक्रममा रनआउट हुँदा विकेटकिपर एलेक्स क्यारेले १२ बलमा २ चौका प्रहार गर्दै १४ रन बनाएर पेविलियन फर्किए ।

यता, ओपनर ब्याट्सम्यान म्याट शोर्ट ९, जोश इंग्लिस ६, एडम जाम्पा ५ रनमा आउट हुँदा कप्तान स्टिभ स्मिथ शुन्य रनमा पेविलियन फर्किए ।

अष्ट्रेलियाले अतिरिक्त रुपमा ७ रन जोड्यो । अष्ट्रेलियालाई सस्तैमा समेत्न भारतका लागि रविचन्द्रन आश्विनले ७ ओभर बलिङ गर्दै ४१ रन दिएर ३ विकेट लिँदा रविन्द्र जडेजाले ५।२ ओभर बलिङ गर्दै ४२ रन दिएर ३ विकेट लिए ।

त्यस्तै, प्रसिद्ध कृष्णले ६ ओभर बलिङ गर्दै ५६ रन खर्चिएर २ विकेट लिँदा मोहम्मद शामीले ६ ओभर बलिण् गर्दै ३९ रन दिएर १ विकेट लिए ।

त्यसअघि टस हारेर पहिला ब्याटिङमा उत्रिएको घरेलु टोली भारतले निर्र्धारित ५० ओभरको खेलमा ५ विकेट गुमाउँदै ३९९ रनको विशाल योगफल तयार गर्यो ।

भारतका लागि सुभम् गिल र श्रेयस लेयरले शानदार शतकिय पारी खेल्दा कप्तान केएल राहुल र सुर्यकुमार यादवले अर्धशतकिय पारी खेले ।

ओपनर ब्याट्सम्यान सुभम् गिलले ९७ बलमा ६ चौका र ४ छक्का प्रहार गर्दै १०४ रन जोड्दा श्रेयस लेयरले ९० बल खेल्नेक्रममा ११ चौका र ३ छक्का प्रहार गर्दै १०५ रन बनाए ।

त्यस्तै, सुर्यकुमार यादवले ३७ बलमा विष्पोठक ब्याटिङ गर्दै ६ चौका र ६ छक्का प्रहार गर्दै ७२ रनको अर्धशतकिय पारी खेल्दै अविजित रहँदा कप्तान तथा विकेटकिपर केएल राहुलले ३८ बलमा ३ चौका र ३ छक्का प्रहार गर्दै ५२ रनको अर्धशकिय पारी खेले ।

यता, इशान किसनले १८ बलमा २ चौका र २ छक्का प्रहार गर्दै ३१ रन जोडेर आउट हुँदा रविन्द्र जडेजाले ९ बलमा १ चौका मद्दतमा १३ रन जोड्दै अविजित रहे ।

रुटुराज गाइकवाद ८ रनमा आउट भए । भारतले अतिरिक्त रुपमा १४ रन जोड्यो ।

भ्रमणकारी टोली अष्ट्रेलियाका लागि क्यामरन ग्रिनले १० ओभर बलिङ गर्नेक्रममा १०३ रन खर्चिएर २ विकेट लिँदा जोश हाज्लेउड, सिन एब्बोट र एडम जाम्पाले समान १–१ विकेट लिए ।