काठमाण्डौँ । नेपाल चिकित्सक संघको आन्दोलनमा ‘नेपाल एच. वान’ ले पनि ऐक्यवद्धता जनाएको छ । शनिबार बानेश्वरमा चिकित्सकहरुले गरेको आन्दोलनमा पुगेर एच वानको तर्फबाट अध्यक्ष जनक भुसालले ऐक्यवद्धता जनाए ।

छोटो भाषण गरेका उनले नेपालको अति संवेदनशिल क्षेत्रको रुपमा रहेको स्वास्थ्य क्षेत्र र त्यहाँ कार्यरत डाक्टर, नर्शहरु आन्दोलनमा उत्रनु पर्ने बाध्यता रहेको भन्दै तत्काल माग सम्बोधन गर्न सरकारको ध्यानाकर्षण गराए ।

चिकित्सकको आन्दोलनमा पिएचडीधारी चिकित्सकहरु सहभागि नभएर टिभी, रेडियोमा अन्र्तवार्ता दिँदै हिँड्नु विडम्बना रहेको भन्दै उनैहरु आन्दोलनको विपक्षमा रहेको भुसालको तर्क छ । अस्पतालमा डाक्टरहरु असुरक्षित रहनु मुलुककै लागि घातक रहेको उनको भनाई छ ।

अहिलेको आन्दोलन डाक्टरको मात्र नरहेर ३ करोड नेपालीको रहेको उनको दावी छ । डाक्टरहरुमाथि कुटपिट र आक्रमण बढ्न थालेपछि केहिदिनदेखि चिकित्सकहरु आन्दोलनमा छन् । आफ्ना माग पुरा नभएसम्म सडक नछाड्ने डाक्टरको भनाई छ । एच वानले कोरियाबाट थर्मल थेरापी मेसिन भित्र्याएर निशुल्क सेवा दिने गर्दछ । यसका मुलुकभर ३० बढी शाखा छन् ।