काठमाडौँ । कपिलवस्तुमा दोश्रो पटक हुन लागेको ‘साइकल प्ल्याङ्क ब्यालेन्स प्रतियोगिता’ मा भारतबाट पनि सहभागिता हुने भएको छ । वाणगंगा नगरपालिकाको वडा नम्ब्र ३ राजापानी सामुदायिक वनको पोखरीमा हुन लागेको प्रतियोगितामा भारतबाट पनि केहि साइकल राइडरको सहभागिता हुन लागेको हो ।

यस प्रतियोगिताबारे थाहा पाएपछि छिमेकी राष्ट्र भारतबाट पनि केहि राइडरले सहभागिता जनाउन लागेको र केहि राइडर आउन थालेको प्रतियोगिताका संयोजक विष्णु घिमिरेले जानकारी दिएका छन् । भारतीय राइडर मनिश कुमारले पनि आफू प्रतियोगितामा आउन लागेको सामाजिक संजालमार्फत् जानकारी दिइसकेका छन् ।

विदेशबाटै साइकलका च्याम्पियन आए पनि यो खेलमा भाग्यले पनि साथ दिनुपर्ने संयोजक घिमिरेले बताए । ‘पोखरीमाथि रहेको ९ इन्चको काठको ट्याक्टमा साइकल गुडाउन त्यति सजिलो छैन । यहाँ राइडर भनेर डराउनु पनि पर्दैन । इच्छुक सबैलाई अनुरोग गर्दछु कि साइकल चलाउन जान्ने जोसुकैले प्रतियोगिताको उपाधि जित्न सक्नुहुनेछ । त्यसैले फाराम भर्न अनुरोध गर्दछु, संयोजक घिमिरे भन्छन् ।

पहिलो संस्करण अपेक्षा गरेभन्दा पनि बढी चर्चित रहेका कारण यसपटक पनि दोश्रो संस्करण गर्न लागिएको क्लवका अध्यक्ष ओम प्रकाश घिमिरेले बताए । प्रतियोगिताको विजेताले नगद ५० हजार रुपैयाँ पाउने छन् भने दोश्रो हुनेले २५ र तेश्रो हुनेले १५ हजार रुपैयाँ नगद पुरस्कार प्राप्त गर्नेछन् । प्रतियोगिताको लागि १५ सय रुपैयाँ लाग्ने अनलाइन फारा भर्नुपर्ने संयोजक घिमिरेले जानकारी दिए ।

अनलाइन फारम भरेको खण्डमा आफ्नै अथवा आयोजकले बन्दोबस्त गरेका साइकल लिएर प्रतियोगतामा सहभागि हुन पाइने घिमिरेले बताए ।

उनका अनुसार अहिले पोखरीमा ट्याक बनाउने लगायतका काम भइरहेको छ । लायनस क्लव अफ कपिलवस्तुको आयोजनामा यहि असोज २७ गते ‘आगामी शनिबार’ हुने प्रतियोगितामा ३०० बढी राइडरले भाग लिने अनुमान गरिएको अध्यक्ष घिमिरेले बताए ।