काठमाडौँ । दिउँसै प्रमुख प्रशासकीय अधिकृतमाथि कुटपिट गर्ने कपिलवस्तुको शुद्धोद्धन गाउँपालिकाका उपाध्यक्ष होम प्रकाश चौधरीले गाडीको विषयमा लफडा भएको बताएका छन् । विहिबार उनले प्रमुख प्रशासकीय अधिकृत कृष्णप्रसाद ज्ञवालीमाथि हातपात गरेको समाचार आएपछि चौधरीसंग बुझदा कारण गाडीको चावी देखिएको हो ।

उनले अपिटाइम्ससंग आफूले कुटेको भने स्विकार गरेनन् । चौधरीले फोनमा भनेका छन् ”होइन कुटपीट भएको छैन । वार्ता काहानी भएछ त्यहाँ । त्यो उसको मुखले भनेको हो । पहिलेदेखि विवाद चलेको थियो । आज चावी माग्दाखेरी अटेरी गर्यो । केहि भएको छैन । वार्ताकारी भएको हो ।”

कति थप्पपड हान्नु भयो कठालो समातेर ? भन्ने प्रश्नमा उनले भने, ”होइन हानेकै होइन दाइ । मिडियामा आइराख्छ । मिडियामा नआउने कुरा पनि आइराख्छ । उससंग गाडीको कारण हो । हाकिमसंग चावी मागे गाडीको । जिल्ला प्रहरी कार्यालयमा एउटा मुद्धा थियो । छलफलमा जाँदै थिएँ म । दिनुस् न हतार छ फोन आइराखेको छ । ड्राइभरलाई मैले भने जा लिएर आइजा । तौलिहवा मलाई छोड । हाकिमले निर्णय गराउनुपर्दछ बल्ल चावी पाउनुहुन्छ हजुरले भन्यो, मैले भनेँ, किन यस्तो भनेको भन्दाभन्दै टेवलमा पीटपाट भएछ । गाला समातेर त्यस्तो केहि गरेको छैन ।”

उनले लामोसमयदेखि नै विवाद जारी रहेको बताएका छन् । सरुवा भइसक्दा पनि हाकिम बसिरहेको उनले अपिटाइम्सलाई बताए । चौधरीले दिउसो २ बजेको समयमा कुटपिट गरेका थिए । यता ज्ञवालीले आफूमाथि कुटपीट भएको भन्दै जिल्ला प्रशासन कार्यालयलाई नै पत्र लेखेका छन् । घटनापछि गाउँपालिकाको सेवा बन्द गर्ने निर्णयसमेत भएको छ ।