कपिलवस्तु । बुद्धभूमि नगरपालिकामा जारी दोश्रो बुद्धभूमि महोत्सवले दर्शकको उल्लेखय साथ पाएको छ । छिमेकी जिल्ला लगायतमा धमाधम महोत्सव र मेला लागिरहेको सन्दर्भमा कस्तो होला भन्ने आयोजकको संसयकाबीच दर्शकले साथ दिएका हुन् ।

उद्घाटनमा पनि उल्लेख्य दर्शक आएकामा शनिबार वडा नम्बर २ को गोरुसिंगेस्थित महोत्सवस्थलमा दर्शकहरु भरिभराउ थिए । चर्चित लोक दोहोरी गायक पशुपति शर्माले करिब २ घण्टा दर्शकलाई मनोरञ्जन दिएका थिए । आयोजकका अनुसार शनिबार मात्र करिब ८ हजार दर्शक आएका थिए ।

तेश्रो दिनसम्मको दर्शकको साथले आयोजक होटल तथा रेष्टुरेन्ट ब्यवसायी संघ हौसिएको छ । संघका अध्यक्ष तथा महोत्सव संयोजक लेखनाथ घर्ती र महासचिव पदम ढकालका अनुसार आगामी दिनलाई पनि राम्रो बनाउने र दर्शक भित्राउनेगरी तयारी रहेको बताए ।
“देश निर्माणमा व्यापारको आवश्यकता सामाजिक एकता कृषि तथा पर्यटन प्रवर्धन” भन्ने मूल नाराका सहित मङ्सिर २४ गतेसम्म महोत्सव संचालन हुनेछ । महोत्सवमा स्थानीय कला संस्कृति र कृषि उतपादन, स्वदेशी खाना र परिकार, डान्स आइडल, स्थानीय र राष्ट्रिय कलाकारको प्रस्तुतिलाई देख्न पाइन्छ ।

महोत्सवको शान्ति सुव्यवस्था मजबुत पार्नका लागि नेपाल प्रहरी लगायतका सुरक्षाकर्मी खटाइएको छ भने दर्जनौको संख्यामा स्वयमसेवक परिचालन गरिएको देखिन्छ ।