१४ औँ कपिलवस्तु महोत्सवमा सहभागी हुने प्रमुख खेलाडी मुना श्रेष्ठ (ड्यागन लेडी) ले प्रतिद्वन्दीलाई पछार्दै

काठमाडौँ । १४ औँ कपिलवस्तु महोत्सव अन्तर्गत यसपटक सबैभन्दा आकर्षणको केन्द्र बन्दैछ छ रेस्लिङ प्रतियोगिता । बाणगंगा वेलफेयर सोसाइटीले वाणगंगास्थित बुद्ध रंगशालामा पश्चिम नेपालमै पहिलोपटक आयोजना गर्न लागेको रेस्लिङ प्रतियोगितालाई लिएर अहिले सर्वाधिक चर्चा छ ।

रेस्लिङको नियम थाहा भएका जानकारदेखि बालबच्चासम्म अहिले उक्त प्रतियोगिताको चर्चा छ । आगामी मंसिर २२ र २३ गते ( शुक्रबार, शनिबार) हुने प्रतियोगितामा रेस्लिङको हार्ड कोर्ट खेल हुनेछ । यो भनेको जोखिमपूर्ण खेल हो । यसमा आगो लगाउनेदेखि साङ्लाले हान्नेसम्मको गतिविधि देख्न पाइने छ । प्रतियोगितामा नेपालकै चर्चित रेस्लर मुना श्रेष्ठको टोलीमा रहेका खेलाडीले प्रतिस्पर्धा गर्नेछन् भने भारतका खेलाडी पनि आउनेछन् । प्रतियोगितालाई लिएर अहिले उक्त टोलीले काठमाडौँमा अभ्यास गर्दैछ ।

आयोजकका अनुसार यो प्रतियोगिता सर्वाधिक चर्चा र जनताको रुचीमा रहेका कारण स्वयम्सेवी भावनाबाट खेलाइँदै छ । अर्थात् यो प्रतियोगिता हेर्न छुट्टै टिकट नलाग्ने र प्रवेश टिकटकै आधारमा हेर्न पाइने छ । सोसाइटीका अध्यक्ष तथा महोत्सवका संयोजक राजकुमार खाँण भन्छन् ‘अन्य स्थानमा छुट्टै पाँच सय, १ हजारसम्मको टिकट लिएर रेस्लिङ चलाएको पाइन्छ । तर हामीले छुट्टै टिकट नलिने निर्णय गरेका छौँ । हामीलाई घाटानाफा जे होला हामी दर्शकलाई प्रवेश टिकटकै आधारमा मनोरञ्जनमा संसारकै चर्चित खेल रेस्लिङ देखाउन खोजिरहेका छौँ ।’

मौकाको फाइदा उठाउन दर्शकलाई अनुरोध गर्दछु । संयोजक खाँणले रेस्लिङ हुने भएपछि युवा र केटाकेटीमा उत्साह देखिएको बताए । अब महोत्सव आउन १ साता पनि छैन । मंसिर २१ गते उद्घाटन हुने महोत्सव पौष १ गते समापन हुनेछ । आयोजकका अनुसार महोत्सवको ५० प्रतिशत तयारी सकिएको छ ।