कपिलवस्तु । कपिलवस्तुको वाणगंगा नगरपालिकाको बुद्ध रंगशालामा पहिलोपटक रेस्लिङको प्रतियोगिता आज हुँदै छ । वाणगंगा वेलफेयर सोसाइटीले हिजोदेखि सुरु गरेको १४ औँ कपिलवस्तु महोत्सवमा पहिलोपटक रेस्लिङ प्रतियोगिता हुन लागेको हो ।

आज र भोलि रेस्लिङको भीडन्त हुँदैछ । रेस्लिङको लागि रंगशालास्थित कभर्डहलमा रेस्लिङ रिङ तयार भएको छ । दुइदिन लगाएर तयार भयएको रिङमा दिउसो ३ बजेदेखि भीडन्त सुरु हुने आयोजकले बताएका छन् ।

मनोरञ्जन विधातर्फ संसारभर नै चर्चित मानिएको रेस्लिङ आफैमा चुनौतिपूर्ण र साहसी खेल हो । त्यहि चर्चित खेल पहिलोपटक आफूहरुले ल्याउन पाउँदा आयोजक हर्षित छ भने यस क्षेत्रका दर्शक पनि उत्साहित छन् । खेलमा दुई दिन ८ वटा प्रतिस्पर्धा चल्ने बताइएको छ । कार्यक्रमकी संयोजक तथा अन्र्तराष्ट्रिय उपाधि विजेता रेस्लर मुना श्रेष्ठ (ड्यागन लेडी) ले खेल हेर्न सबैमा अनुरोध गरिन् । उनका अनुसार प्रतियोगितामा नेपाल र भारतका खेलाडीको प्रतिस्पर्धा हुने छ । रेफ्रीसहित २० जनाको टोलीमा भारतका ४ रेस्लरहरुको पनि सहभागिता छ ।
यस्तो छ खेल तालिका

शुक्रबार स्नेहाविरुद्ध मिन्नीको भीडन्त हुनेछ भने दोश्रो खेलमा दुईदुईजनाको फाइट हुनेछ । त्यसमा किङ कोब्रा र सउल सेडाइले जोन र ज्वालासंग फाइट गर्नेछन् । यस्तै सोही दिन नै ट्याग टिम म्याच हुनेछ ।

यस्तै दोश्रो दिन मंसिर २३ गते महत्वपूर्ण ४ वटा भीडन्त हुनेछन् । त्यसमा नेपाल र भारतबीच भीडन्त हुनेछ । जसमा आरके दास र ज्वाला, अजिंगर, मारुती भारत र नेपालको प्रतिस्पर्धा हुनेछ । सोहि दिन नै किङ कोब्रा र सैनिटसंग सउल सेडाइको लडाई हुने संयोजक मुना श्रेष्ठले जानकारी दिइन् ।

२३ गते नै हार्ड कोर्ट म्याच पनि हुनेछ । जसमा बाबा बुई साइनाइट, फोर आरके दास र लेडी ड्रयागन (मुना श्रेष्ठ) ले हार्ड कोर म्याच खेल्नेछन् । रेस्लिङका विधा या प्रकारमध्ये हार्ड कोर डरलाग्दो र खतरनाक खेल हो । यसमा हार्डकोर, फायर म्याच र ब्लड म्याच छन् । यी तीनै खेल निकै कठिन हुने र ज्यानको बाजी राखेरै खेल्नुपर्ने हुन्छ । यसमा साङलाले हान्नेसम्मका जोखिमपूर्ण गतिविधि हुने गर्दछन् । त्यसैले यसलाई डेथ म्याच पनि भन्ने गरिन्छ । विश्वरभर हार्ड कोरलाई निकै रुचाउने गरेको पाइन्छ । ड्रयागन लेडी हार्ड कोरमा नेपालकोतर्फबाट बिभिन्न अन्र्तराष्ट्रिय बेल्ट ल्याउन सफल रेस्लर हुन् । उनी सामाजिक संजालमा भाइरल पनि छन् । संयोजक श्रेष्ठका अनुसार टाइसिटमा तलमाथि पनि पर्न सक्नेछ ।

प्रतियोगितालाई रोचक बनाउन आफूहरुले निकै मिहिनेत गरेकोले सबैलाई सहभागिताको लागि श्रेष्ठको आग्रह छ ।
यता महोत्सवका संयोजक तथा वेलफेयरका अध्यक्ष संयोजक राजकुमार खाँणले टिभीमा हेरिरहेको रेस्लिङ लाइभ हेर्ने मौका नगुमाउनको लागि सबैलाई अनुरोध गरे ।