काठमाडौँ । नेपाली कांग्रेसको शेखर कोइराला र गगन थापा समूहले करिब एक वर्षपछि आन्तरिक समीक्षा गरेको छ । काठमाडौँको बत्तिसपुतलीमा बुधबार बसेको शेखर गगन समूहको भेलामा आन्तरिक मनमुटाव, महासमिति बैठक, राष्ट्रियसभा निर्वाचन लगायतका विषयमा छलफल भएको हो ।

नेता कोइरालाले बोलाएको भेलामा केन्द्रीय पदाधिकारी, केन्द्रीय सदस्य, सांसद, प्रदेश सभापति लगायत तीन दर्जन नेता सहभागी थिए । भेलामा नेताहरुले पार्टीको संस्थापन इतर पक्षलाई बलियो बनाएर जानुपर्ने मत राखेका थिए ।

पछिल्लो समय नेता शेखर कोइराला र महामन्त्री गगन थापाबिच देखिएको संवादहीनताका विषयमा नेताहरुको चासो थियो । भेलामा महामन्त्री थापाले आफूहरुबिच छलफल नहुँदा समस्या देखिए पनि मूलभूत रुपमा आफूहरु एकै ठाउँमा रहेको बताए ।

उनले भने, ‘हाम्रो बिचमा छलफल कम हुँदा समस्या देखिएका हुन् । मूलभूत रुपमा हामी सबै एकै ठाउँमा छौँ । पार्टीभित्रको सुझाव र सुशासनको सवालमा पनि एकै ठाउँमा छौँ । तर, कार्यशैलीगत सवालमा केही असमझदारी होलान्, संवादबाट हल गर्छौं ।’

यस्तै नेता कोइरालाले पनि आफू र महामन्त्री थापाबिच बाहिर आएजस्तो कुनै द्वन्द्व नरहेको बताए । ‘गगनजी र मसँग कुनै डिफ्रेन्सेस थिएन । एजेण्डाको सवालमा महामन्त्रीजीसँग मेरो केही पनि फरक छैन । एक इन्च पनि फरक छैन । उहाँको उमेर र सोचाइ मसँग फरक छ । त्यो स्वाभाविक हो । त्यसले मात्रै हो । एजेण्डामा कुनै समस्या छैन,’ उनले भने ।

नेता कोइरालाले समूहभित्र अन्तरद्वन्द्व देखाएर जथाभावी नबोल्न कार्यकर्तालाई निर्देशन पनि दिएका थिए ।