कपिलवस्तु । बुद्धभूमि नगरपालिकाका नगर प्रमुख केशव कुमार श्रेष्ठले हरेक खेल खेल्ने खेलाडीले अनुशाषन पालना गर्नुपर्नेमा जोड दिएका छन् । वडा नम्बर १ को नर्शरी रंगशालामा विहिबारबाट सुरु भएको ७ औँ मेयर कप फुटबल प्रतियोगिताको उद्घाटन सत्रलाई सम्बोधन गर्दै नगर प्रमुख श्रेष्ठले खेलमा अनुशाषन सबैभन्दा महत्वपूर्ण रहेको बताएका हुन् । खेल खेल्दा हरेक खेलाडीले जितभन्दा अवसरलाई प्रमुखता दिएमा आफै अनुशाषन कायम हुने बताए । मेयरकपमार्फत् नगरले हरेक बर्ष फुटवल खेलमार्फत् खेलाडी उत्पादन गर्दै आएको बताउँदै मेयर श्रेष्ठले खेलमा प्रतिस्पर्धा भए पनि जित नै सबै कुरा नभएको बताए ।
पछिल्लो समय बुद्धभूमि नगरपालिकाले खेलको बजेटमा वृद्धि गरेको बताउँदै अब हरेक वडामा सुविधासम्पन्न खेल मैदान बन्ने दावी गरे ।
वीरमापुरमा रहेको नर्शरी खेल मैदानमा नगरले अहिले सानो प्याराफिट नै बनाएको छ । प्याराफिटबाट खेल हेर्दा त्यहाँका खेलाडी र विद्यार्थीले नौलो खालको अनुभव रहेको बताए ।
नगर खेलकुद विकास समितिका अध्यक्ष थम प्रताप थापाको अध्यक्षता, मेयर श्रेष्ठको प्रमुख आतिथ्यमा सम्पन्न कार्यक्रममा वडा नम्बर ३ का वडा अध्यक्ष गोविन्द प्रसाद आचार्यले स्वागत मन्तव्य राखेका थिए । कार्यक्रममा प्रमुख प्रशासकीय अधिकृत धु्रब प्रसाद नेपाल, वडा नम्बर १ का वडा अध्यक्ष तेज प्रसाद बस्नेत, २ का वडा अध्यक्ष सुरज प्रताप राणा लगायतको सहभागिता थियो ।
४ दिनसम्म चल्ने मेयरकपको उद्घाटनमा वडा नम्बर ९ र ५ भीँडेका थिए । जसमा वडा नम्बर ५ बिजयी भएको छ ।