कपिलवस्तु । कपिलवस्तु उद्योग बाणिज्य संघको अध्यक्षमा उम्मेदवारी दिने घोषणा गरेका रुक बहादुर भुसालले चुनाव या सर्वसम्मत जे भए पनि आफूले जित्ने दावी गरेका छन् । संघका पूर्व बरिष्ठ उपाध्यक्ष समेत रहेका भुसालले आगामी माघ २३ गते हुने संघको अधिवेशनमा अध्यक्ष पदको लागी उम्मेदवारी दिने बताइसकेका छन् ।

आफूले हात हालेका हरेक क्षेत्र सफल भएको बताउँदै त्यहि विश्वासको आधारमा ब्यवसायीले आफूलाई रोज्ने बताए । आफ्नो चाहना चुनाव नगराउने र सर्वसम्मत रुपमै संघको अध्यक्ष चयन हुनुपर्ने बताउँदै आएका भुसालले चुनाव भए पनि आफूले जित्ने दावी गरे ।

संघको आसन्न अधिवेशनलाई केन्द्रित गरी केहि समयअघि अपिटाइम्सले १४ औँ कपिलवस्तु महोत्सवको सचिवालयमा भुसालसंग अनौपचारिक कुराकानी गरेको थियो । त्यतिखेर संघको चुनाव र आगामी नेतृत्वबारे केहि कुराकानी भएको थियो । त्यहाँ उनले आफू अध्यक्षको उम्मेदवार रहेको खण्डमा चुनाव या सर्वसम्मत जे भए पनि विजयी हुने बताएका थिए ।
उनले भनेका थिए ‘चुनाव गराएर संघलाई द्धन्द्धमा फसाउने मेरो चाहना छैन । धेरै साथीहरुले मलाई उठ्न भनेका छन् । तर अझै मैले त्यो सोँच बनाएको छैन । तर उठेँ भने हार्नेगरी उठ्दिन, मेरो पक्षमा सहमति नै हुन्छ जस्तो लाग्छ । वरियताले पनि मेरै अध्यक्ष हुने पालो हो । चुनाव भए पनि मैले हार्दिनँ यत्ति बुझ्नुस् । ‘ आफू वरिष्ठ उपाध्यक्ष रहँदा संघको चार तले विल्डिङ आफ्नै नेतृत्वमा बनेको भन्दै मौका पाए काम गरेर देखाउने भुसालले बताए ।अहिले त भुसालले अध्यक्षको उम्मेदवारी दिने बताइसकेका छन् ।

ईट्टा तथा काठ व्यवसायी समेत रहेका भुसालले आफु संघको नेतृत्व लिन सक्षम रहेको जिकिर गर्दै सबैलाई मिलाएर लैजाने उनको दाबी छ । आफू अध्यक्ष भएमा मारमा परेका उद्योगी व्यवसायीहरुले राहत पाउने उनले बताए । आफ्नो उम्मेदवारीमा काँग्रेस एकजुट हुने पनि उनले बताए । यता एमालेबाट संघका पूर्व वरिष्ठ उपाध्यक्ष गुणनिधि भुसाल, काँग्रेसबाट हालका महासचिव मनोज पौडेल लगायत पनि अध्यक्षका आकाँक्षी छन् ।