चन्द्रकान्त न्यौपाने,
काठमाडौँ । कपिलवस्तुको एक फोटोग्राफर जोडी एक्कासी भाइरल बनेको छ । फोटो ग्राफर संघ कपिलवस्तुको पारिवारिक बनभोज कार्यक्रममा अरेली काँडैले मलाई च्वास्सै, च्वास्सै तीजको गीतमा नाचेको जोडी एक्कासी भाइरल बनेको हो ।
मंसिर २१ गते बुद्धभूमि नगरपालिका वडा नम्बर ४ बुड्डीमा संघले पारिवारिक बनभोज कार्यक्रम राखेको थियो । त्यहाँ संघमा आवद्ध सदस्यको जोडी सहभागि थियो ।

तीमध्ये थिए बाणगंगा नगरपालिका वडा नम्बर २ निवासी लेखनाथ पौडेल र मञ्जु पौडेलको जोडी । ढाकाको कोटमा सजिएका दुवै गीतमा निकै डुबेर गीतमा नृत्य गरेका छन् । दुईमध्ये श्रीमान् लेखनाथको नृत्य विशेष छ । उनी गीतमा चुर्लुम्म डुब्दै श्रीमतीसंग कामुक रहेको देखिन्छन् उनको भाउभङ्गी पनि चाखलाग्दो छ ।

यसै भिडिओलाई संघका सदस्य फोटोग्राफर तथा पत्रकार भक्तिराम घिमिरेले त्यतिखेरै आफ्नो फेसबुकमा अपलोड गरेका थिए । अपलोड गरेपछि त्यो भिडिओले नपत्याउने भ्यूज र प्रतिक्रिया पायो ।

भक्तिरामको फेसबुकमा एक हप्तामै उक्त भिडिओलाई १० लाख बढीले हेरेका छन् भने लाइक र प्रतिक्रिया दिने पनि उत्तिकै छन् । यो समाचार तयार पार्दासम्म १० हजारले लाइक गरेका छन् भने १२० बढी कमेन्ट्स आएका छन् । नृत्य गरेका लेखनाथले पनि यस्तो भाइरल होला भनेर नृत्य नगरेको बताए । लेखनाथले वाणगंगा २ पिपरामा सुनचाँदी ब्यवसाय पनि गर्दछन् ।