कपिलवस्तु । काठमाण्डौँ महानगर प्रमुख बालेन्द्र शाहले मातहतका विद्यालयमा गरेको एक कार्यक्रमको शैलीमा कपिलवस्तुको एउटा संस्थागत विद्यालय पनि हिँडेको छ । वाणगंगा नगरपालिका वडा नम्बर २ पिपरामा रहेको हिलबर्ट ईङ्गलीस बोर्डिङ्ग स्कुलले यस्तो कार्यक्रमको सुरु गरेको हो ।

विद्यालयले सुरु गरेको कार्यक्रम ‘क्रियाकलापमा आधारित सिकाई कार्यशाला’ हो । काठमाडौँका मेयर बालेन्द्र शाहले काठमाण्डौँका सामुदायिक विद्यालयलाई केन्द्रित गरी सिकाइमा आधारित र सिप विकास गर्ने खालका गतिविधि गरिरहेका छन् । बालेनले त्यहाँ हरेक शुक्रबार यस्तो कार्यक्रम गर्न भनेका छन् ।

सोहि अनुसार रुपन्देहीको कुवरवर्ति विद्यालयका शिक्षक शिक्षिकाहरुलाई पनि संगै राखेर हिलवर्टमै दुई दिने कार्यशाला सुरु गरेको विद्यालयले जनाएको छ ।

क्रियाकलाप मैत्री अर्गानिक नेपालका प्रमुख कार्यकारी अधिकृत अर्जुन भट्ट र वरिष्ट मन्टेश्वरी प्रशिक्षक कमला देवकोटाले दुई दिन कार्यशालाको सहजिकरण गर्नेछन् ।

कार्यशालाको पहिलो दिन सिक्षण सिकाई क्रियाकलाप सुरु गर्नुपुर्व विद्यार्थीहरुको ध्यानलाई एकत्रित गर्ने तरिका लगायतका विषयमा प्रशिक्षित गरिएको छ भने दोश्रो दिन पनि यस्तै खाले रचनात्मक कार्यक्रम हुनेछ ।

उनीहरुका अनुसार विभिन्न प्रयोगात्मक शैक्षिक सामग्री सहित प्रशिक्षण दिईएको छ । जसबाट विद्यार्थीहरुले गरेर सिक्ने मान्यतामा धेरै सिकाइ उपलब्धि हासिल गर्नेछन् । स्कुलका प्रबन्ध निर्देशक बुद्धि पौडेलले यस्तो कार्यशाला कपिलवस्तुमा पहिलोपटक भएको बताए । उनका अनुसार कार्यशालामा दुवै विद्यालयका १ सय बढि शिक्षकशिक्षिका र शैक्षिक ब्यक्तिहरुको सहभागिता छ ।

विद्यालयका अध्यक्ष दिपक खनालले विद्यार्थीलाई अब अघि बढाउने परीक्षा लिने दिने कार्यले मात्र सम्भव नरहेकाले बिभिन्न अतिरिक्त कार्य गर्न जरुरी रहेको बताए । उनी भन्छन् विद्यार्थीमा अनेक विलक्षण प्रतिभा छन् यसको उजागरणको लागि घोकन्त विद्याले मात्र काम गर्दैन । यस कार्यशालाले विद्यार्थीमा नयाँ उत्साह प्रदान गर्नेमा विश्वस्त छु । खनालले काठमाडौँमा यस्तो कार्यशालाको सुरुवात भएको थाहा पाएपछि आफूले पनि यस्तो परिकल्पना गरेको बताए ।

वाणगंगा नगरपालिका शिक्षा, युवा तथा खेलकुद शाखा प्रमुख खिम बहादुर जिसीले कार्यशालाको उद्घाटन गरेका थिए ।
उनले पनि काठमाडौंमा मेयर बालेनको उदाहरण दिँदै जीवनोपयोगी सिप विकासका लागि शुक्रबारलाई प्रयोग गर्दा अझ राम्रो हुने भनाइ राखेका थिए ।

प्रिन्सिपल शिव कुमार पोख्रेलले सम्भव भएसम्म यस्ता कार्य हरेक शुक्रबार भइरहने जानकारी दिए । कार्यक्रममा विद्यालय व्यस्थापन समिति सदस्य यादव मरासिनि, कुवरवर्ती विद्यालयका व्यवस्थापन समिति सदस्य कुल प्रसाद पौडेल, मावि तह संयोजक सन्तोष खनाल लगायतको सहभागिता थियो । कार्यक्रमको संचालन नेपाली विषय विभाग प्रमुख तेज प्रसाद आचार्यले गरेका थिए ।