चन्द्रकान्त न्यौपाने,

काठमाडौँ । ब्यक्तिगत हिसाबले लुम्बिनी प्रदेश सभा सदस्य माननीय विष्णु पन्थी मलाई नराम्रो लाग्दैन । उहाँसंग संगत गरेको करिबन ६ बर्ष पुगेको छ । पहिलो कार्यकालको संसद अवधिमा मात्र होइन दोश्रो कार्यकालको चालु अवधिसम्म पनि यहाँलाई कुनै ठाउँमा असहयोग गरेको लाग्दैन । तपाईको सरलता, विनम्रता र बौद्धिकताको मैले धेरै ठाउँमा मुक्तकण्ठले प्रसंसा गर्ने गरेको छु ।

तपाईको जनताले नदेखेको एउटा चरित्र छ तर त्यसमा म कहिल्यै गइनँ । कमजोरी सबैका हुन्छन् । तथापि अरु नेताभन्दा तपाई विसेक लाग्छ । त्यसैले अहिले पनि तपाईप्रति मेरो कुनै आग्रह, पूर्वाग्रह, वैमनश्यता केहि पनि छैन । हिजो जुन आँखाले तपाईलाई हेर्ने गरेको थिएँ अहिले पनि मेरो दृष्टि हजुरप्रति उस्तै छ ।

हिजो चुनावमा तपाईका ठुला ठुला स्टोरी लेख्ने, हजुरको प्रचार र प्रवद्धन हुने जिंगल बनाउने मै हुँ, नभुल्नु होला । पहिलो कार्यकालमा मिडियाबाट भाइरल बनाउने पनि मै हुँ त्यो पनि नभुल्नु होला । रेडियो अनलाइनमा कैयौँपटक तपाई र तपाईको कामलाई स्थान दिएको थिए र जनतासंग सम्प्रेषण गरेको थिएँँ स्मरणै होला । मलाई स्मरण छैन आजको मितिसम्म तपाईको प्रतिपक्षमा रहेर समाचार लेखेको । असहयोग गरेको । कतिपय हजुरका कमिकमजोरी थाहा हुँदाहुँदै पनि हजुरलाई मिडियाबाट उँचो नै बनाएको थिएँ । धेरै सुनेको थिएँ तर लेख्न जरुरी ठानेको थिइनँ आजसम्म । तर यसपटक भने मलाई चुप रहन मनै रहेन, माफ गर्नुहोला माननीय ज्यू बाध्यतावश तपाईको साँघुरो र संकिर्ण मानसकिता अनि त्यो लघुताभासमाथि केहि कुरामा प्रष्ट पार्न जरुरी ठानेको छु । समय रहे पढ्नुहोला ।

कपिलवस्तु नगरपालिकास्थित सगरहवा मुर्ति कार्यशालाको विषयमा म प्रधान सम्पादक र प्रकाशक रेहेका अपिटाइम्सबाट खबर प्रकाशन हुनुपूर्व धेरै मिडियामा आइसकेको थियो । समाचारमा आएको विषयलाई मैले हुबहु प्रकाशन गरेको मात्र के थिएँ तपाईको नजरमा म विकास विरोधी ठहरिएछु ।

तपाईमाथि लगानी भएको विगतको मेरो योगदान भुलेर तपाई मसंग सामाजिक संजालमा जाइलाग्न थाल्नुभयो र कार्यकर्तालाई पनि अराजक शैलीमा उत्रन भन्नुभएछ । यसको लागि धन्यबाद दिन चाहान्छु । समाचारमा आएका विषय आयोजकसंग सम्बद्ध थिए । लुम्बिनी विकास कोषसंग सम्बद्ध थियो । तर उनीहरुलाई नपोल्दै त्यो समाचारले तपाईलाई पोल्न भ्याएछ । हुन त तपाई सामाजिक संजालमा भाइरल माननीय र नेता हो । तर सबै कुरा सामाजिक संजालमार्फत् पोख्दा के हुन्छ भनेर बुझ्न सक्नुभएन कि बुझ्न बाञ्छनीय ठान्नु भएन या कसैले तपाईलाई उक्साइरहेको छ पत्तो पाइनँ ।

यति सानो विषय । खबरदारीको विषय । तपाईको नाम नजोडिएको विषयमा म र खबरदारी गर्ने युवालाई विकासविरोधीको ट्याग दिनुभयो । खबरदारी गर्नेमाथि तपाई यति हलुङ्गो तवरले प्रस्तुत हुनुभयो कि यो तपाईको स्ट्याटसले पुष्टि गर्दछ । तपाईले लेख्नुभएको छ ‘कपिलवस्तुमा (सगरहवा) सानो काम के हुँदै थियो केहीलाई बढो छटपटी छुटेको देखिन्छ ? जति सकिन्छ बिरोध गरौं हामीलाई थप उर्जा हुनेछ । जगदीशपुर र कपिलवस्तु हाँस्दा बिचराहरु रुन्छ्न त !’

हामी बेठिक छौँ रोऔँला । याद राख्नु तपाईहरुको बेठिकपनले पनि तपाईहरुलाई नरुवाउला भन्न सकिन्न । जगदीशपुर र कपिलवस्तु हाँस्ने कुरा गर्नुभएको छ । हाँसेको हेर्न के हामी कपिलवस्तुबासीलाई इच्छा नहोला र ? हामी युवा आतुर छैनौँ होला जिल्ला हाँसेको हेर्न ? तर हँसाउने बनाइयो कि जिल्लालाई रुवाउने बनाइएको छ एकपटक ऐना हेरौँ त ।

मलाई तपाईका विगत र अहिलेका हरेक भाषणको हेडलाइन थाहा छ । तपाईले भनेजसरी विकास भएको हुन्थ्यो भने मुलुकका ७७ मध्ये ७६ जिल्लका नागरिक कपिलवस्तु र जगदिशपुर हेर्न आउँथे । अरु कुरा गरिनँ । म फेरि फर्केँ मुर्ति कार्यशालामै । मिडियाले मुर्ति बने भनेर आहारिस गरेको होइन त्यहाँ भएको के हो भनेर पो खबरदारी गरेको हो नि । तर यहि विषयमा तपाई हलुङ्गो हुनुभयो । बिझाउनेलाई विझाएन तपाईलाई विझायो । पहिलो प्रश्न छ सगरहवाको पुरातत्वलाई मिचेर बलजफ्ती मुर्तिहरु बनाइएको हो कि होइन ? मुर्ति बनाउनु नराम्रो होइन राम्रो हो तर यहाँ राजनीति चलेको छ कि छैन ? के पुरातत्व विभाग, लुम्बिनी विकाष कोष, पर्यटन मन्त्रालयसंग समन्वय गरेर मुर्तिहरु बनाउन थालिएको हो ? हो भने लुम्बिनी विकास कोषका उपाध्यक्ष ल्यालकर लामाले किन असहमति प्रकट गरे ? किन सबैले अपनत्व लिन सकेनन् ?

कार्यशालाको लागि ५५ लाख खर्चेको कुरा कुरा आएको छ भने समाचारपछि ७० लाखको कुरा पनि जोडिएको छ । यो खर्च कहाँ कसरी भयो भनेर प्रश्न गर्दा म कसरी विकासविरोधी युवा भएँ ? हजुरले ८ गते निम्ता डाक्नु भएको छ तर काठमाण्डौँमा छु आउन सक्दिनँ । पत्रकार साथीलाई बुझाउँदा पनि मसंग सुचना आउँछ । यो खर्चको पारदर्शिता सार्वजनिक गर्नुहोला । सुनेको छु मुर्ति बनाउने ठेक्का लिने ब्यक्ति अर्कै छ रे ? कसले बनाएको हो त्यो पनि छर्लङ्ग पारिदिनु होला त्यो दिन ।

त्यो रकमको कुरा छोडिदिऔँ जे भएको हो पछि आउला । अस्ति मुर्ति कार्यशालाको उद्घाटनमा मञ्च पाउनेवित्तिकै भन्नुभएको थियो अब कपिलवस्तुबासीले केहि गर्नुपर्दैन । सबै पर्यटनबाट हुन्छ । त्यो भनेको त्यहि मुर्ति देखाएर हो या जगदिशपुर ताल देखाएर ? के यी मुर्ति र त्यो तालले अब कपिलवस्तुबासीले केहि गर्नु नपर्ने हो ? यस्ता वाइयात भाषण दिन उप्रान्त बन्द गर्नुहोला ।
हजुरले भने अनुसार के कपिलवस्तुको पर्यटन विकास भइरहेको छ त ? कदापी छैन । किनकि बषौँ पहिलेदेखिको बुद्धको तपस्याभूमि र २९ बर्ष विताएको तिलौराकोटले अझै पनि पर्यटक पर्खेर बसेको छ । तिलौराकोट वरपरको बाटोघाटोको स्थिति के कुरा गरौँ ? विश्व रामसार सुचिमा सुचिकृत जगदिशपु्र ताल यस्तै हुनुपर्दथ्यो कि अरु धेरै भएकोमा हुनुपर्दथ्यो ? हामीले यहाँ खोजेको पिकनिक खान मात्रै हो कि डलर झार्न हो माननीय ज्यू ? तिनचार दिन पर्यटक रहनबस्न मिल्ने गरी कुन भौतिक संरचना खडा गर्यौँ त ? जगदिशपुर तालवरपर कति सुविधा सम्पन्न होटल, लज र रिसोर्ट बनेका छन् ?

विडम्बना विश्वभरका पर्यटक तान्ने क्षमता राख्ने तिलौराकोट, जगदिशपुर तालमा कमिला पनि हिँड्दैनन् । आएका पाहुनाले पनि मिठाई, बिस्कुट र पानीका खोल फालेर हिँड्ने गरेका छन् । त्यहाँ फोहरको डङगुर जम्मा भइरहेको छ दिनप्रतिदिन ।
माननीय ज्यू पर्यटकबाट पैसा झार्नुलाई पो पर्यटन भनिन्छ मान्छे आउने अनि पानीका खाली बट्टा फाल्नेलाई पर्यटन भनिन्छ र ?
पर्यटक आए भने रहन बस्नको लागि खोई जगदिशपुर र सगरहवामा सुविधासम्पन्न र ठुलाठुला होटल र रेष्टुरेन्ट ? पर्यटक आउनको लागि सफा, फराकिला र चिल्ला बाटा खोई ? उनीहरुको लागि किनमेल गर्ने खोई सांस्कृतिक बजार ? खोई थारु संस्कृतिका होमस्टे । भैरहवा र लुम्बिनीसम्म कपिलवस्तु, तिलौराकोट, जगदिशपुर झल्काउने खोई प्रचारप्रसारका डिजिटल होर्डिङ बोर्ड ? खोई डिजिटल नक्साहरु ? यसबारे हजुरले कहिल्यै बहस र पैरवी गर्नु भएको छ ?

आज लुम्बिनी विकास हुँदा खोइ तिलौराकोट र जगदिशपुरको विकास भएको ? योजना र भिजनविना हचुवामा पर्यटन पर्यटन भनेर पर्यटनको विकास हुँदैन नि माननीय ज्यू । अलिअलि विकास त मैले पनि बुझेको छु, तपाईले जति नबुझे पनि । पिकनिक खाने आन्तरिक मात्र होइन जगदिशपुर, तिलौराकोट र सगरहवामा हामीलाई बाह्य पर्यटक चाहिएको छ । डलर फाल्ने पर्यटक चाहिएको छ, फोहर होइन । यस्तो वातावरण निर्माणमा खोई पहल गरेको ? तपाई त पूर्वमन्त्री पनि हुनुहुन्छ खोई यस्ता संरचनामा प्रदेशको लगानी र बजेट ? खोई त्यस्ता योजना ? यी संरचनाको विकास नगरीकन मुर्ति बनाएर पर्यटक आउँदैनन् माननीय ज्यू ।

तपाईको भाषणले पर्यटन विकास भएको हुन्थ्यो भने बाणगंगा नगरपालिकाको मुहार नै फेरिसक्थ्यो आजसम्म । हजुरको भाषणले बन्थ्यो भने बाणगंगा नदीमा यतिखेर पानी भण्डारण स्टोर बनेको हुन्थ्यो । हजुरको भाषणले बनेको हुन्थ्यो भने वडा नम्बर ३ राजापानीमा वहुउपयोगितासहितको वृहत थारु संग्रहालय र भ्यू टावर बनिसकेको हुन्थ्यो । यतिखेरसम्म विदेशी हजारौँ विदेशी पर्यटक आएर डलर झारिसकेका हुन्थे । राजापानीमा ? भाषणले हुने भए वडा नम्बर ८ मा सेनाले बनाएको बोटानिकल गार्डेनमा झाडी हुँदैनथ्यो, कपिलधाम, मधुवनधाम, कैलाश आश्रमको अहिलेको हालत हुने थिएन ।

एकपटक आफैले हजुरले गरेका भाषणका हेडलाईन सम्झनूस् त माननीय ज्यू । के हजुरले जहाँ गए पनि हुन्छ र गर्छु भनेर गरेका बाचा पुरा भएका छन् त ? सबैले भन्छन् छैनन् । धेरैले भन्न थालेका छन् हुन्छ बहादुर पन्थी । यस्तो सुन्दा म पनि दुखि छु ।
अर्कोतर्फ तपाई कम्युनिष्ट नेता हो । कम्यु्निष्ट नेताले मुर्ति, मन्दिर, मस्जिद, चर्च, गुम्बा बनाएर पर्यटन विकासको कुरा गर्दैनन् । समाजबाद र साम्यबादी सोँच राख्नेहरुले त ७० लाखमा उद्योग विस्तार गरेर मजदुरलाई रोजगारी दिने कुरा गर्दछन् । एक हिसाबले भन्ने हो भने सगरहवामा मुर्ति नबनाएर एउटा चिस्यान केन्द्र या किसानका उत्पादन बेच्ने बिक्रिकेन्द्र बनाउन सकिन्थ्यो । तर्क गर्न थालियो भने अनेक कुरा आउँछन् माननीय ज्यू ।

अन्त्यमा तपाई मैले मात्र होइन सबैले मानेको नेता हो । आजको यो लेख लेख्दासम्म तपाईप्रति म पुरानै आत्मियता र प्रेम भाव राखेको छु । यसले तपाईको चित्त या दिल दुख्यो भने त्यो मेरो कमजोरी रहनेछैन हजुरकै कमजोरी रहने छ । सानो समाचारलाई लिएर युवालाई विकासविरोधी भन्नु भएको हुनाले सानो विकास बुझाउन मात्र खोजेको हुँ । धन्यबाद ।