चन्द्रकान्त न्यौपाने

काठमाडौँ । कपिलवस्तु उद्योग बाणिज्य संघको आगामी ३ बर्षे कार्यकालको लागि चुनाव हुँदै गर्दा अन्तिम समयमा आएर काँग्रेस, माओवादी, राष्ट्रिय जनमोर्चा, नेकपा एस, राप्रपाको गठबन्धन बन्यो । संघको चुनावमा एक्लै भीँडेको एमालेले यस गठबन्धनलाई महा-गठबन्धनको संज्ञा दिएको थियो ।

संघको चुनावमा अध्यक्ष लगायतका पदमा जित हासिल गर्ने कुरा एमालेलाई कठिन थियो नै तर प्रतिस्पर्धा गज्जब र प्रतिस्पर्धात्मक हुन्छ भन्नेमा उनीहरु आशाबादी थिए । नभन्दै शनिबार भएको चुनावको आइतबार अन्तिम नतिजा घोषणा हुँदा यस्तै भयो । अध्यक्षमा एमालेले भनेको महागठबन्धनका गणेश बहादुर क्षेत्री, वरिष्ठ उपाध्यक्षमा हुमानाथ पौडेल र महासचिव पदमा नवदत्त घिमिरे विजयी हुँदा उपाध्यक्ष लगायतका महत्वपूर्ण पदमा एमालेबाट पनि केहि उम्मेदवार विजयी भए ।

तीमध्ये एमालेले जितेको संघको सबैभन्दा ठुलो पद भनेको बाणिज्य उपाध्यक्ष हो । यसमा महागठबन्धनलाई चकित पार्दै एमालेका नारायण पौडेल विजयी भए । उनले हासिल गरेको मत संघको चुनावमा सबैभन्दा बढी हो । सर्वाधिक लोकप्रिय मतसहित पौडेल विजयी भए ।

पोडेलले १२ सय २० मत हासिल गर्दा प्रतिद्वन्दी गठबन्धनका घनश्याम अधिकारीले जम्मा ६६३ मत मात्र प्राप्त गरे । अर्थात् ५५७ मतान्तरमा पौडेलले महागठबन्धनका अधिकारीलाई हराए । उनको यो जितलाई एमालेले गठबन्धनमाथिको झापड मानेको छ भने कतिपय एमाले नेताले जितकै रुपमा लिएका छन् ।

यता नवनिर्वाचित पौडेलले यस विषयलाई ठुलो रुपमा नलिन आग्रह गरे । यो जितपछि आफुलाई थप जिम्मेवारी बोध भएको उनले प्रतिक्रिया दिए । निर्वाचनको विशेषता हारजितलाई मनमा राखेर चुनाव लडेको तर ब्यवसायीबाट यस्तो माया पाउँछु भन्ने आंकलन नगरेको बताउँदै पौडेलले यो मतलाई कहिल्यै पनि अपमान नगर्ने बताए । आफू सदैव ब्यवसायीको हितमा रहने उनले बताएका छन् ।

अटो ब्यवसायी पौडेल बिभिन्न पेशा र ब्यवसायमा आवद्ध छन् । उसो त पौडेलको सर्वाधिक मत आउने आंकलन गरिएको थियो तर गठबन्धनमाथि यो अन्तरको जितको अपेक्षा कसैले गरेका थिएनन् ।

पोडेललेको यो चुनावी नतिजाले उनी ब्यवसायीमाझ कति प्रिय रहेछन् भन्ने कुराको पुष्टि गर्दछ । पौडेलसंगै कोषाध्यक्ष, सहकोषध्यक्ष र सचिव पदमा पनि एमाले उम्मेदवार विजयी भएका छन् । अध्यक्ष जित्ने सपना पुरा नभए पनि यस नतिजाले एमालेलाई केहि उत्साहित भने बनाएको छ ।