चन्द्रकान्त न्यौपाने
कपिलवस्तु । नेपाल पत्रकार महासंघ कपिलवस्तुको भवन दिनप्रतिदिन जिर्ण हुँदै गएको छ । तौलिहवास्थित भवनमा महासंघका कुनै क्रियाकलाप नहुँदा र एक जना पनि कर्मचारी नहुँदा रेखदेखको अभावमा भवन जिर्ण बन्दै गएको हो । कार्यालयमा संगिता भुसाल कर्मचारी भएर बस्दासम्म पहिले केहि हदसम्म बिसेक थियो तर अहिले भुसाल पनि नहुँदा सुनसान छ भने वरीपरि फोहरै फोहर छ ।

भवनको हालत देख्दा यस्तो लाग्दछ यो महासंघको भवन नभएर कुनै कवाडी खाना हो । बाहिर साङ्ले ताल्चा लगाइएको छ । साङला र ताल्चामा खिया लागेको छ । पर्खाल भित्र र बाहिरको प्राङ्गणमा झार उम्रिएर झाडी हुन लागेको छ । भवनभित्र पनि धुलोमैलो देखिन्छ भने कोठाहरु जनावर वस्नेजस्ता भइसकेका छन् । त्यहाँ रहेका फर्निचर पनि धुलाम्य देखिन्छन् । कार्यलयमा रहेका दराजमा रहेका महासंघका कागजपत्रको अवस्थाको के हालत् होला खोली हेरेपछि मात्र थाहा होला ।
घरको माथिल्लो तला प्लाष्टर गरी त्यस्तै छाडिँदा निकै फोहर देखिन्छ । भवनको अन्य क्षेत्रको संरक्षणमा पनि गम्भिर लापरबाही छ ।

समाचार श्रोत अनुसार यो भवनमा बिभिन्न सरकारको सहयोग, चन्दादानको हिसाब गर्दा न्युनतम ३० लाख बढी खर्च भएको देखिन्छ । पहिलो तला निर्माण सम्पन्न गर्न ११ लाख बढी खर्च भएको थियो भने पछि दोश्रो तल्ला सम्पन्न गरी सक्काउँदा थप रकम खर्च भएको थियो । रकम लिएर पनि दोश्रो तलामा अझै पूर्ण काम भएको छैन ।

सरकार र दाताको यतिधेरै रकम खर्च गरी भवन बनाइए पनि यो भवन जिर्ण बन्दा ‘सरकारको लगानी बालुवामा पानी’ भएको छ भन्दा फरक पर्दैन । भवनले अहिले संरक्षण पर्खेर बसेको छ । महासंघको भवनको यस्तो अवस्था देखेपछि सरोकार राख्ने ब्यक्तिले पनि संस्थालाई गिज्याउन थालेको बताइन्छ ।

महासंघका अध्यक्ष किरणमान बज्राचार्यले भएको एक जना कर्मचारी विरामी भएपछि पछिल्लो एकडेढ महिना कर्मचारी नभएको बताए । विरामी कर्मचारी ठिकभएपछि आएर सरसफाइ लगायतको काम हुने उनको भनाई छ । अध्यक्ष मात्र नभएर बर्तमान कार्यसमितिमा रहेका कसैले पनि यसको संरक्षण र संवद्धनमा ध्यान दिन सकेका छैनन् भने पूर्वअध्यक्षहरु पनि जाने, हेर्ने, संरक्षण गर्ने लगायतका कुरामा चुकेका छन् ।

महासंघले बिभिन्न संघसंस्था, पालिका लगायतबाट बर्सेनी लाखौँ रकम जम्मा गरे पनि संघको भवन मर्मतसम्भारमा चासो नदिएका श्रोत बताउँछ ।
महासंघमा आवद्ध पत्रकार सदस्यले भवनमा साधारण सभा, अधिवेशन बाहेकका अरु कार्यसम्पादनका काम विरलै हुँदा भवन यस्तो भएको बताउँछन् । उनीहरुका अनुसार सचिव, कोषाध्यक्षले पनि आआफ्नै घरमा महासंघको कार्यसम्पादनका काम गर्दछन् ।
यति मात्र होइन बाणगंगा नगरपालिका र बुद्धभूमिमा रहेका अन्य २ वटा भवन पनि अलपत्र छन् । ती भवनमा सरकारको लाखौँ लगानी परे पनि महासंघका जिम्मेवार ब्यक्तिले सामान्य रुपमा लिएको देखिन्छ । ‘कहिँ नभएको जात्रा हाँडिगाउँमा भनेझैँ’ ७७ जिल्लामा नभएको चटक यहाँ देखिन्छ । एउटै भवन संहार गर्न नसक्नेले ३/३ वटा भवन बनाएर प्रयोगविहिन बनाउँदा स्वयम् पत्रकारहरु पनि क्रुद्ध छन् ।