कपिलवस्तु । बाणगंगा नगरपालिकाको सरकारी विद्यालयको प्रश्नपत्रमा गम्भिर त्रुटी र लापरबाही देखिएको छ । कक्षा १ को हाम्रो सेरोफेरो (विज्ञान) विषयको नमुना प्रश्नमा यस्तो त्रुटी भएको भेटिएको हो । प्रश्न नम्बर १ को जोडा मिलाऊनुहोस् शीर्षकमा विद्यार्थीले बुझुन् भनेर सजिलोको लागि संकेत दिइएको छ । जसमा भैँसीको बाच्छोमा संकेत गरिएको छ । यो भनेको भैसीको बच्चोलाई बाच्छो भनिन्छ भन्न खोजिएको हो । जबकि भैसीको बच्चोलाई पाडो या पाडी भनिन्छ । प्रश्न पत्रमा पाडो मात्रै छ ।
यहि अनुसार सबै विद्यालयमा विद्यार्थीले परीक्षा दिइसकेका छन् । नगरले संकेत विगारेपछि ६ अंकको प्रश्नमा विद्यार्थीको उत्तर नै उलटपुलट हुने निश्चित छ । त्रुटी सानो भए पनि यसले अंकन र विद्यार्थीको मुल्यांकनमा नै फरक पार्ने शिक्षकहरु नै बताउँछन् ।

के भन्छन् भण्डारी ?

सो नमुना प्रश्न पत्र कुनै विद्यालयका शिक्षकले काटेका होइनन् बाणगंगा नगरस्तरीय परीक्षा समितिमा रहेका विद्वान ब्यक्तिले तयार पारेका हुन् । यस विषयमा नगर शिक्षा समिति संयोजक कविराज भण्डारीसंग बुझ्दा भुलवस त्यस्तो हुन गएको छ । त्यो भुल आफूहरुको तर्फबाट नभई कम्युटरमा प्रिन्ट गर्नेबाट भएको भण्डारी बताउँछन् । उनले भने ‘पहिले शिक्षकले प्रश्न काटेर विद्यालयबाट शिक्षा समितिमा पठाउँछन्, त्यसपछि समितिले पटकपटक रुजु गर्छ । त्यसपछि पनि फेरि विज्ञबाट प्रमाणित गर्ने काम भएर बल्ल प्रिन्ट हुन्छ । मलाई लाग्छ त्यो प्रिन्टमा गएपछि भएको त्रुटी हो । मैले मुल कपि पनि हेर्छु ।’ भण्डारीले कम्प्युटरबाट त्यस्तो हुन गएको भन्दै अन्यथा नलिन आग्रह गरे ।

मुल कपी हेरेपछि कम्युटरबाट त्रुटी भएको पत्ता लागेको भण्डारीले बताए । यो त्रुटीलाई स्कुलका शिक्षकले मिलाएकाले थप समस्या सिर्जना नहुने भण्डारी बताउँछन् । अपिटाइम्सले बुभ्दा स्कुलका शिक्षकको पनि यहाँ ध्यान गएको देखिदैन । स्कुलमा शिक्षकले पनि त्रुटी नसच्याएको भए अनिवार्य रुपमा २ अंक गडबड भएको छ ।

गत चैत्र १ गतेदेखि नगरपालिकाका सामुदायिक विद्यालयमा परीक्षा संचालन भइरहेको छ भने परीक्षा ८ गते सकिने छ ।
त्रुटी सानो भए पनि यसले नगरको नेतृत्व र परीक्षा समितिको अनविज्ञतामा प्रश्न उठाउने सरोकारवाला बताउँछन् । ‘यसमा गम्भीर लापरबाही नै देखिन्छ, यो सामान्य विषय होइन । यसले विद्यार्थीको अंकमा पनि फरक पार्छ । नगरले यस्ता त्रुटी गर्दा आलोचना हुनु स्वभाविक हो, प्रश्नपत्र प्रिन्ट भएपछि पनि सच्याउन सकिन्थ्यो तर त्यो संवेदनशिलता देखिएन । आ, भइहाल्यो भन्नेमा गए । यस्तो लापरबाही पटकपटक हुने गरेको छ’, एक जना अभिभावक भन्छन् ।

प्रश्न पत्रमा ठेगाना पनि छैन । बाणगंगा नगरस्तरीय परीक्षा भनेर पनि उल्लेख नगर्दा कहाँको हो भनेर बुझ्न पनि कठिन हुन्छ । ठेगाना नराखेर पनि प्रश्न पत्रमा लापरबाही गरिएको छ । शिक्षासंग सरोकार राख्ने अरुले पनि नगरपालिकाको विद्धत बर्गले काटेको पत्रमा यस्तो भुल हुनै नहुने बताउँछन् ।परीक्षा समिति हुनुपर्नेमा नगर शिक्षा समिति भएकोले सच्याएका छौँ ।