काठमाडौँ । कपिलवस्तुमा संचालित प्रथम तिलौराकोट गोल्डकपको सेमिफाइनल समिकरण पुरा भएको छ । मंगलबार भएको क्वाटरफाइनलमा सुदुरपश्चिम ११ ले त्रिभुवन आर्मीलाई पराजित गरेसंगै सेमिफाइनल पुग्ने ४ टोली ‘ए डिभिजनका २ र मोफसलका २ टिम’ को टुङ्गो लागेको हो ।

मंगलबार सुदुरपश्चिमले आर्मीलाई टाइब्रेकरमा ४-३ गोल अन्तरले पराजित गरेको हो । निर्धारित ९० मिनेटसम्म दुवै टोलीले गोल गर्ने प्रयास गरे पनि गोल नहुँदा खेलको निर्णय टाइब्रेकरमार्फत् भएको हो ।

टाई ब्रेकरमा सुदूरका विष्णु चौधरी, अभिनाश थापा, बुद्धदेव शाही र धीरेन्द्र शाहले गोल गरे। फागुराम चौधरीले भने गोल गर्न सकेनन्।

आर्मीका लागि ओमप्रकाश रोका, दिल लामा र मानबहादुर आले मगरले गोल गरे। तर, सन्तोष केसी र जीवन कुमारले गोल गर्न सकेनन्।खेलको म्यान अफ दी म्याच सुदूरका गोलरक्षक दीपक बोहरा भए। उनले १० हजार रुपैयाँ प्राप्त गरे।

अब सुदुरपश्चिमले पर्सी हनामी चितवन एफसीसंग खेल्ने छ भने भोलि पहिलो सेमिफाइनलमा थ्रीस्टार क्लव र नेपाल पुलिस क्लवबीच प्रतिस्पर्धा हुने छ ।