कपिलवस्तु। विभागीय टोली नेपाल पुलिस क्लब प्रथम कपिलवस्तु तिलौराकोट गोल्डकपको फाइनलमा प्रवेश गरेको छ ।

कपिलवस्तुस्थित बुद्ध रंगशालामा बुधबार भएको पहिलो सेमिफाइनल खेलमा पुलिसले थ्रीस्टारलाई १–० गोल अन्तरले पराजित गर्दै फाइनल पुग्ने पहिलो टोली बनेको हो ।
उपाधिको प्रमुख दावेदार मानिएको थ्रीस्टार निकै रोमाञ्चक खेलको दोश्रो हाफको ५१ औँ मिनेटमा थ्रीस्टार सम्हालिन सकेन ।
पुलिसका विवेक पाण्डेले त्यतिखेर गोल गरे । त्यो नै खेलको निर्णयक गोल बन्यो । खेलको अन्तिमतिर थ्रीस्टार फर्कन प्रयास गरेको थियो तर पुलिसका रक्षा पंतीका खेलाडीले थ्रीस्टारका खेलाडीको कुनै पनि बललाई जाली चुमाउनबाट रोके ।
राष्ट्रिय टोलीका पूर्व कप्तान विराज महर्जनको कप्तानीमा मैदान उत्रेको थ्रीस्टारमा अनन्त तामाङ, विदेशी खेलाडी ओलावाले लगायत थिए तर पनि उनीहरुले हार टार्न सकेनन् । अब पुलिसले उपाधिका लागि सुदूरपश्चिम–११ र हनामी बीएफसीबीचको विजेतासँग खेल्ने छ।

यी दुई टोलीको दोस्रो सेमिफाइनल खेल बिहीबार दिउसो ३ बजेदेखि सुरु हुने छ ।