कपिलवस्तु । विद्युत सर्ट भएर एक्कासी लागेको आगलागीका कारण बाणगङ्गामा लाखौँको क्षति भएको छ । वडा न ८ पुलचोकको खड्क कलौनिमा आगलागी हुँदा एउटा बंगुर फर्म नै जलेर नष्ट भएको हो भने तिन वटा टहरा पूर्ण रुपमा नष्ट भएका छन् ।
आगोलागीका कारण स्थानीय दिल बहादुर थापाका ६ वटा माउ र ३ वटा बच्चा बंगुर मरेका छन् । समयमा आगो निभाउन नसक्दा साना ठूला गरि करिब ९ वटा बङ्गुर जलेर नष्ट भएको प्रहरीको भनाई छ । प्रहरीका अनुसार उक्त फर्ममा करिब ८ लाख बराबरको क्षति भएको छ ।

यस्तै केशव बहादुर थापा, दुध बहादुर चौधरी र बालकुमारी सुनारको घर जल्दा १ र १ लाखको क्षति भएको इलाका प्रहरी कार्यालय पिपराका प्रमुख गोपाल जङ्ग रायमाझीले बताए ।

आगो लागेपछि निभाउन सकस भएको थियो । बाणगंगा नगरपालिकाको दमकलले नियन्त्रण गर्न नसकेपछि
कपिलवस्तु र शिवराज नगरपालिकाबाट ३ वटा दमकल, १ वटा ट्याङ्कर घटनास्थलमा आएका थिए । त्यसपछि जनपथ प्रहरी, शसस्त्र प्रहरी तथा स्थानीयको सहयोगमा आगो नियन्त्रणमा आएको थियो ।