कपिलवस्तु । जिल्लाको बाणगंगा नगरपालिकामा श्रीमान-श्रीमतीको मृत्यु भएको कारणबारे आधिकारिक जानकारी प्राप्त भएको छ । वडा नम्बर ८ ढोडेकोलको एउटा घरमा बुधबार विहान श्रीमान-श्रीमती मृत फेला परेका थिए । मृत फेला पर्नेमा करिब ५५ वर्षकी जुठि भुषाल थिइन् भने करिब ६० वर्षका टेकलाल भुषाल थिए । जुठि विस्तरामा मृत थिइन् भने श्रीमान भर्याङमा झुण्डिएको अवस्थामा फेला परेका थिए ।

इलाका प्रहरी कार्यालय पिपराका अनुसार श्रीमान टेकलाल भुसालले सुरुमा श्रीमती जुठीको विस्तरामा ह’त्या गरेका थिए । उनले टाउकामा धारिलो हतियार (दाउ) प्रहार गरेको खुलेको प्रहरीले जनाएको छ । दाउ प्रहारबाट श्रीमतीको मृत्यु भएपछि श्रीमानले पनि आत्मह’त्या गरेको प्रहरीको भनाई छ । मंगलबारी राति घरमा कोही नभएको मौका छोपी श्रीमानले हत्या गरेका हुन् । राति घरमा कोहि भएको भए घटना हुनबाट जोगिन सक्ने प्रहरी बताउँछ । घटनाबारे प्रहरीले विहान ८ बजेपछि मात्र जानकारी पाएको थियो । त्यसपछि घटनास्थलमा पुगेर प्रहरीले शव निकालेको थियो ।

शवलाई लुम्बिनी प्रादेशिक अस्पताल बुटवलमा पोष्टमार्टम गरेपछि अहिले घरमा बुझाइएको छ । उनीहरुका ३ छोराहरु छन् । तिनमध्ये १ जना विदेश रहेको र २ जना काठमाडौँ रहेका थिए । काठमाडौँबाट छोराहरु आउन ढिलाई भएपछि पोष्टमार्टम प्रकृया पनि ढिलो भएको पिपराका प्रहरी नीरिक्षक गोपालजंग रायमाझीले बताए । प्रहरीको प्रारम्भिक जानकारी अनुसार दुईजनाबीचको बेमेलले घटना निम्तिएको हो । छिमेकीहरुले पनि उनीहरुबीच राम्रो सम्बन्ध र समझदारी नरहेको बताएका छन् ।

घटनाको डिएसपीसहितको टोलीले अनुसन्धान गरिरहेको छ । के कारणले यस्तो घटना भएको हो यसबारे अनुसन्धानपछि बताउने प्रहरीले जनाएको छ ।