चन्द्रकान्त न्यौपाने

कपिलवस्तु । एमाले कपिलवस्तुबाट ७९ वैशाखमा स्थानीय तहमा निर्वाचित भएका जनप्रतिनिधिलाई अहिले लेवी तिर्न भ्याइनभ्याई छ । सबै काम छोडेर उनीहरुको पहिलो काम लेवी तिर्ने छ भन्दा फरक नपर्ला । आजसम्म चुपचाप बसी पार्टीको अनुशाषनविपरित नियमित लेबी नतिरेकाहरुले अहिले धमाधम लेबी तिर्न तँछाडमछाड गर्नुको कारण हो सम्मुखमा आएको १० औँ जिल्ला अधिवेशन ।

पार्टीले विगत २ बर्षदेखिको लेबी तिर्न बाँकी रहेका स्थानीय तहका कुनै पनि जनप्रतनिधिलाई यसपटक प्रतिनिधि र उम्मेदवार नबनाउने निर्णय लिएको थियो । सो पार्टीको निर्णयसंगै जिल्लाका १० स्थानीय तहका जनप्रतिनिधि लेबी तिर्न बाध्य भएका हुन् ।
पार्टीको सो कठोर निर्णयसंगै पार्टीमा लाखौँ कोष जम्मा हुने भएको छ ।

एक नेताका अनुसार ती अटेर जनप्रतिनिधिहरु लाजकाजले अहिले लेबी तिर्न वडा, नगर र जिल्ला कमिटिका कार्यालयमा धाइरहेका छन् ।
अपि टाइम्सले प्राप्त गरेको जानकारी अनुसार एक जना जनप्रतिनिधिको भागमा ७२ हजारसम्म लेबी रकम तिर्न बाँकी रकम रहेको छ ।

पार्टीले उम्मेदवार बनेर निर्वाचित भएकाहरुमध्ये नगरप्रमुख र उपप्रमुखको लागि मासिक २५०० र ३०००, वडा अध्यक्षलाई मासिक १५ सय, कार्यपालिका सदस्यलाई मासिक १००० र वडा सदस्यलाई मासिक ५०० का दरले लेवी रकम तोकेको छ ।

यसरी हेर्दा एउटा नगरप्रमुख या पालिका अध्यक्षको भागमा २ बर्षको ७२ हजार, नगर उपप्रमुखको भागमा २ बर्षको ६० हजार, एउटा वडा अध्यक्षको भागमा २ बर्षको ३६ हजार, एउटा कार्यपालिका सदस्यको भागमा २ बर्षको २४ हजार र एउटा वडा सदस्यको भागमा २ बर्षको १२ हजार तिर्नुपर्ने हिसाब बाँकी छ । वडा कमिटी र नगरकमिटिबाट लेवी तिरेको प्रमाणित सिफारिरस गरेपछि मात्र प्रतिनिधि बन्न योग्य हुने गरी पार्टीले निर्णय गरेको थियो ।

वडा सदस्यले वडा कमिटि, वडा अध्यक्ष/कार्यपालिका सदस्यले नगरकमिटि र नगरप्रमुख, उपप्रमुखले जिल्ला कमिटिमा लेवी रकम बुझाउनु पर्ने छ । ती नेताले बताए अनुसार कतिपय प्रमुख र उपप्रमुखले नै लेवी तिरेका छैनन् भने अधिकांस वडाअध्यक्ष, कार्यपालिका सदस्य र वडासदस्यले पनि लेवी तिरेका छैनन् । कपिलवस्तुमा लगभग १ सय १५ जना जति जनप्रतिनिधि छन् ।

‘पार्टीका वैठकमा नियमित सहभागि नहुने, नियमित लेवी नतिर्नेहरुलाई पार्टीमा अनुशाषनको प्रश्न उठ्ने गर्दछ’, ती नेता भन्छन् ‘आजसम्म लेवी नतिर्नेहरु अनुशाषनहिन, अटेर र अवसरवादी हुन् । यस्तामाथि पार्टीले थप कडाई गर्नुपर्दछ । जरिवानासहित रकम तिराउनुपर्दछ ।’

बिभिन्न कमिटीमा बस्न नपाउन र उम्मेदवार बन्न नपाउने स्थिति सिर्जना भएपछि मात्र उनीहरु लेबी तिर्न बाध्य भएकाले तिनलाई पार्टीले स्पष्टिकरण पनि सोध्नु पर्ने इमान्दार नेता कार्यकर्ता बताउँछन् ।

पार्टीको जिल्ला अधिवेशन हुन अब एक साता मात्र बाँकी छ । पार्टी अध्यक्ष केपी शर्मा ओलीले वैशाख २६ गते अधिवेशनको उद्घाटन गर्दैछन् । मुलुकको अस्थिर र विचारशुन्य राजनीतिका कारण अहिले पार्टीका नेता कार्यकर्तामा निरासा छ । त्यहि निरासाका कारण लेवि तिर्ने लगायतका काममा सदस्यको रुची नभएको बताइन्छ । यसको चपेटामा मुख्य गरी एमाले, काँग्रेस र माओवादी छन् ।