बाणगंगा । कपिलवस्तुको बाणगंगा नगरपालिकामा स्थापना भएको बाणगंगा राइडर्स क्लवले साइक्लिङसंगै सामाजिक र मानवीय कार्यको पनि थालनी गरेको छ । वातावरणीय तथा शारीरिक स्वास्थ्यको लागि साइकल चलाउनु पर्दछ भन्ने जनचेतना जगाउने उद्धेश्यले स्थापना भएको क्लवले अब सामाजिक कार्यमा पनि संलग्न रहनुपर्दछ भन्ने निर्णंय गर्दै वडा नम्बर १ बाट सामाजिक कार्यको थालनी गरेको हो ।

उत्तमनगर ‘उप्टहवा’ मा बनेको स्वास्थ्य चौकीमा विरामीको लागि शुद्ध खानेपानीको सुविधा छैन भन्न सुनेपछि क्लवमा आवद्ध सदस्यहरुले रकम जुटाई तातो चिसो शुद्ध पानी पिलाउने फिल्टर मेसिन हस्तान्तरण गरेका हुन् । क्लवका अध्यक्ष विष्णु प्रसाद सापकोटा, क्लवको परिकल्पनाकार विष्णु घिमिरे लगायतको टोली मंगलबार विहानै सात बजे साइकल ड्रेसमै फिल्टर हस्तान्तरणको लागि स्वास्थ्य चौकीमा पुगेका थिए ।

फिल्टर ग्रहण गर्दै स्वास्थ्य चौकीकी इन्चार्ज ईश्वरा खरेलले विरामीको लागि क्लवले ठुलो गुन लगाएको बताइन् । आमा समुहले दिएको जग्गामा स्वास्थ्य चौकीको भवन बनेको भए तापनि त्यहाँ अझै पनि केहि कुराहरुको अपुग छ, इन्चार्ज खरेलले भनिन् ‘सहयोगको लागि क्लवलाई धन्यबादक्क्वले निकै राम्रो काम गरेको छ । हामीले नगरमा पनि यसबारे समिक्षा गर्नेछौँ । हजुरहरुको सहयोगले यहा आउने विरामीको लागि धेरै राम्रो गर्नेछ ।’

उनले स्वास्थ्य चौकीको समग्र अवस्था ‘राम्रो र अभाव पक्ष’ बारे पनि बताएकी थिइन् । स्वास्थ्य चौकीले क्लवलाई खादा, पुष्पगुच्चाले स्वागत गरेको थियो ।

क्लवका अध्यक्ष सापकोटाले क्लव स्थापना भएको धेरै समय भएको भए पनि दर्ता प्रकृया पुरा भएको २ महिना मात्र भएको जानकारी गराउँदै आगामी दिनमा नगरका दुखी, गरिब र असहाय ठाउँमा क्लव पुग्ने, जनचेतनामुलक कार्यक्रम तथ पर्यावरण संरक्षण र सरसफाइको लागि काम गर्ने बताए ।

कार्यक्रमको संचालन सचिव रामचन्द्र बेलबासेले गरेका थिए । उनका अनुसार अब जनप्रतिनिधिका कामको पनि क्लवले बेलाबेलामा अनुगमन गर्ने छ ।

टोली अब नगरका कुना कन्दरामा पुग्ने र विकास निर्माणको अवलोकन र अध्ययन संगै आवश्यक ठाउँम खबरदारी गर्ने क्लवका सदस्यहरु बताउँछन् । क्लवमा करिब ४० जना सदस्य आवद्ध छन् । सबै सदस्यहरु यस क्षेत्रका ब्यापार, ब्यवसाय र पेशामा आवद्ध भएका ब्यक्ति हुन् ।

उनीहरु विहान विहान क्लवको पहेँलो जर्सी लगाएर नगर भित्र तथा बाहिरका बिभिन्न ठाउँहरुमा साइकल चलाएर पुग्ने गर्दछन् । स्वास्थ्य बन्न र बातावरण सफा राख्नको लागि यस्तो अभियान सुरु गरिएको क्लवका उपाध्यक्ष विष्णु गैरेले बताए । टोलीलाई देखेर अहिले क्लवप्रति आकर्षण बढेको छ ।