चन्द्रकान्त न्यौपाने
काठमाडौँ । राष्ट्रिय स्वतन्त्र पार्टीका प्रमुख सचेतक सन्तोष परियारले पार्टीले भातृसंगठन बनाउने संकेत गरेका छन् । उनले एक अनलाइन पत्रिकालाई अन्तरवार्ता दिँदै यस कुराको संकेत गरेका हुन् । पुराना पार्टीहरुलेजस्तो भातृसंगठन नबनाउने कसम खाएको पार्टी पछिल्लो समय भातृसंगठनबारे छलफलमा रहेको उनले बताए ।

पार्टी निर्माणको दुई वर्षको अवधिको अनुभवका आधारमा उनले भनेका छन् ‘सुरुमा भ्रातृ सङ्गठनहरू निर्माण नगर्ने प्रक्रियामा थियौँ । अहिले त्यसमा पनि छलफल चलेको छ । ठूलो, भद्दा र व्यवसायिक ठाउँमा भ्रातृ संगठन निर्माण नगर्ने भन्ने आज पनि हाम्रो बुझाइ छ ।’

उनले थपे ‘छन् ‘पार्टीमा नर्सरी त चाहिने रहेछ । हामीकहाँ लिडर बनाएर ल्याउने अरू पार्टीको जस्तो भ्रातृ संगठन छैन । यसबारे बहस चलेको छ । सानो बनाएर जाने कुरा छ । धेरै संरचना नबनाएर काम गर्ने संगठन बनाउँछौँ । पार्टी विस्तारमा ध्यान दिन्छौँ ।’

पार्टी स्थापना भएको दुई वर्ष पुग्दा धेरै ठाउँमा चुकेको र कमजोरी भएको उनको स्वीरोक्ति छ । आफूहरुले धेरै कुरा नबुझेको, समाज बुझ्न बाँकी रहेकोले चुक्नु परेको उनले बताए । नेता र कार्यकर्ताले समाजको विविधता र अन्तरद्वन्द्व बुझ्न आवश्यक रहेको उनले बताए ।