बुटवल । बुटवलको एभरेष्ट उच्च माविमा अध्ययनरत विद्यार्थी सोहन घिमिरेले विद्यूतीय मोटरसाइकल बनाएका छन् । उनले मोटरसाइकल बाइक बनाएको कुरा विद्यालयले फेसबुकमार्फत् जानकारी गराएको छ ।

कक्षा ११ मा अध्ययनरत सोहनले बनाएको बाइक झट्ट हेर्दा कुनै विश्वस्तरीय कम्पनीको भन्दा कमसल देखिँदैन । स्कुलका अनुसार चार घण्टा चार्ज गर्दा फुल चार्ज हुने बाइक ५० किलोमिटरको प्रतिघण्टामा कुद्न सक्ने गरी बनाइएको छ। एकपटक चार्ज गरिसकेपछि यो बाइक ८० किलोमिटरसम्म कुद्न सक्ने सोहनले अपिटाइम्सलाई बताए । सानैबाट आविष्कारमा रुची राख्ने सोहन यस अघि पनि यस्तै आविष्कारबाट चर्चित बनेका थिए ।

बाइकको फुल बडी कालो छ भने अगाडीपट्टी रातो लुक्स निकालिएको छ । रातोमुनि पनि हल्का निलो रहेको छ । दुई जना बस्न मिल्ने गरी बनाइएको बाइकको हेडलाइटलाई बुलेट बाइकको जस्तो आकारमा ढाल्न खोजिएको देखिन्छ । राज्यले प्रोत्सहान दिन सके उनले अब नेपालमै अरु धेरै बाइक बनाउन सक्ने दाबी गरे ।

सोहनलाई सबैले सहयोग गर्न सके उनले नेपालमा विद्यूतीय बाइक निर्माणमा क्रान्ति गर्न सक्ने विद्यालयले जनाएको छ । सोहनले बाइक बनाएपछि धेरै जना अचम्ममा परेका छन् । उनले बाइक निर्माणको लागि चाहिने सामाग्री परिवारको सहयोगमा स्थानीयस्तरबाट नै जुटाएका बताइएको छ ।