कपिलवस्तु, जितपुर । नेकपा एमाले कपिलवस्तुका नेता तथा सांसद गिरीधारीलाल न्यौपानेले नेता कार्यकर्ताहरुलाई आचरणको पाठ पढाएका छन् । पार्टीको जिल्ला इन्चार्जसमेत रहेका न्यौपानेले एमालेका नेताकार्यकर्ता भन्नेवित्तिकै जनताले प्रसंसा गर्ने खालको हुनुपर्ने भन्दै आचरणको पाठ पढाएका हुन् ।

एमाले बाणगंगा नगरपालिका कमिटिको दोश्रो नगर अधिवेशनको उद्घाटन सत्रमा बोल्दै न्यौपानेले भने, ‘म एमालेका सम्पूर्ण नेताकार्यकर्तालाई आग्रह गर्दछु कि हाम्रो आचारण अरुको भन्दा फरक हुनुपर्दछ । हाम्रा नेता कार्यकर्ता कतै रक्सी खाएर ढलेको अवस्थामा देखिनु हुन्न । जुवातासबाट टाढा रहनुपर्दछ । लडाई झगडा गर्नु हुँदैन । यस खालका आचारणमा हामी रहनुपर्दछ ।’
नेता कार्यकर्ता ठिक आचरणमा रहँदा जनतामा विश्वास बढ्ने उनले दावी गरे । जिल्लामै बाणगंगा नगरपालिका हरेक हिसाबले अभिभावक रहेको हुँदा यस नगरले जिल्लाभरका अरु कमिटिमा सन्देश दिनुपर्ने भन्दै उनले सहमतिमा नेतृत्व चयन गर्नु पर्ने बताए ।
अहिले पार्टीमा माओवादी, काँग्रेस, मसाल लगायतबाट पनि मानिसहरु प्रवेश गरेको हुँदा हिजोको कुरा बिर्सेर सबै एकजुट भएर पार्टी बलियो बनाउनु पर्ने उनको तर्क छ । अहिले मुलुकको मुल मियो एमाले भएको भन्दै मुलुकका हरेक समस्या समाधान एमालेबाट मात्रै सम्भव भएको उनको भनाई छ ।

माओवादी शान्ति प्रकृयामा आएपछिको बाँकी कार्यभार ‘टिआरसी विधेयक’ लाई पारित गर्ने काम एमाले नेतृत्वबाटै भएकाले एमाले सबैको अभिभावक रहेको उनले दावी गरे ।

सुरुमा जनयुद्ध मानेरै आएका उनले एमालेमा गएपछि भने माओवादीको जनयुद्धलाई जनयुद्ध भन्नबाट उनी पछि हटेका छन् । शुक्रबार एमालेको अधिवेशनमा पनि उनले माओवादीले भन्ने गरेको जनयुद्ध भन्दै टिआरसी विधेयकको कुरा गरेका थिए ।