जितपुर । एमाले बाणगंगा नगरको आगामी ३ बर्षे कार्यकालको लागि हुने चुनावमा अध्यक्षका प्रतिस्पर्धी मदन शाहीले आफूले सजिलै जित्ने दावी गरेका छन् । लामो समय आफू र सिंगो परिवार पार्टीको काम र संगठन विस्तारमा होमिएकाले यसपटक नेताकार्यकर्ताले आफ्नो विवेक नगुमाउने बताउँदै शाहीले आफ्नो जित निश्चित भएको बताएका हुन् ।

विहान १० बजेदेखि हुने चुनावमा डटेर प्रचार प्रसारमा लागेका शाहीले अपिटाइम्ससंग भने, ‘मैले चुनाव जित्नेमा कुनै शंका छैन । यसपटक एमालेका नेता कार्यकर्ताले राम्ररी बुझिसकेका छन् सबैलाई । कसलाई भोट हाल्ने सबै थाहा पाइसकेका छन् । कसैको पछि लाग्छन् भन्नेमा विश्वास छैन ।’

शाहीले बाणगंगामा प्रतिपक्षीसंग डगेर लड्ने नेतृत्व आवश्यक रहेको बताउँदै अधिकांस युवाको समर्थन आफूले पाएको बताए ।
उनी थप्छन् ‘वडावडामा पनि मलाई कुनै डर छैन, हरेक वडाबाट मेरो समर्थनमा युवाहरुको समर्थन छ । ३ र ४ नम्ब्र वडा मेरै हो । अन्य वडामा साथीहरुले बातावरण बनाउनु भएको छ । जित निश्चित छ ।’

सोमनाथ अर्याल आफ्नो सहकर्मी भएकाले उहाँबारे कुनै हलुका टिप्पणी नगर्ने पनि शाहीले बताए । ‘उहाँ चुनावी मैदानमा आउनु राम्रो हो । स्वस्थ प्रतिस्पर्धा हुन्छ । चुनावमा नआएर मलाई सघाएको भए राम्रो हुने थियो, शाहीले भने, तर पनि ठिकै छ ।’

शाही एमालेमा बढेलेखेका ब्यक्तिका रुपमा चिनिन्छन् । अंग्रेजी विषयका शिक्षकसमेत रहेका शाहीमा कुन परिस्थितिमा कसरी चल्ने भन्ने ज्ञान भएको एक जना युवाले बताए ।

‘नम्र हुनु राम्रो हो । तर जहिले पनि नम्र भएर हुँदैन । बाणगंगामा हाम्रो प्रतिस्पर्धी काँग्रेस हो, काँग्रेससंग भीड्न शाहीजस्ता प्रवृत्तिका मान्छेलाई नेतृत्वमा लैजानु पर्दछ । अबका दिनमा बाणगंगा एमालेमय बनाउने हाम्रो मिसन छ, अपिटाइम्ससंग उनले भने । शाहीको पक्षमा मतदान गर्न पनि ती युवा प्रतिनिधिको सबैलाई आग्रह छ ।

नगर अधिवेशनमा २११ प्रतिनिधि सहभागि छन् । शाहीलाई बर्तमान जिल्लाको नेतृत्वको साथ रहेको बताइन्छ ।
शाहीसंग झविलाल पोख्रेल, बाबुराम खनाल लगायतका नेताले झुकाव राख्दा सोमनाथ अर्यालको पक्षमा भने डम्बर शर्मा, गिरीधारीलाल न्यौपाने, वडा अध्यक्ष बाबुराम अर्याल, नगरप्रमुख चक्रपाणी अर्याल लगायतको साथ देखिन्छ ।

जनप्रतिनिधि भएर संगै काम गरेका कारण झुकाव अर्यालसंग भए पनि नगर प्रमुख चक्रपाणी अर्यालले शाहीको पक्षमा रहेको गजेहडाका एक जना युवाले जिकिर गरे । यता अर्याले भने खुलेर कतै पनि लागेको पाइँदैन । दुवै नेता बलियो प्रतिस्पर्धी रहेको हुनाले कसले चुनाव जित्छ यसै भन्न नसकिने नेताहरु बताउँछन् ।