कपिलवस्तु । साइकल चढेर ब्यक्तिगत र वातावरणीय स्वास्थ्यमा जनचेतना जगाइरहेको बाणगंगा राइडर्स क्लवको अध्यक्षमा पुनः विष्णु प्रसाद सापकोटा चयन भएका छन् । वडा नम्बर २ नन्दनगरमा भएको प्रथम साधारण सभा तथा अधिवेशनबाट २ बर्षे कार्यकालको लागि सापकोटाको पुरानै समितिले निरन्तरता पाएको हो ।

३ जना सदस्यबाहेक पुरानै सदस्य सर्वसम्मत भएका क्लवमा उपाध्यक्षमा विष्णु गैरे, सचिवमा रामचन्द्र बेलबासे, सहसचिवमा तुल्सीराम भुषाल र कोषाध्यक्षमा तिलक पौडेल सर्वसम्मत भए । यस्तै नयाँ सदस्यमा रोहन पौडेल, हरि पौडेल र हरि घिमिरे सर्वसम्मत भए भने डांसुराम न्यौपाने, युवराज कंडेल र नरेन्द्र खांण सदस्यमा दोहोरिएका हुन् ।
उनीहरुलाई निर्वाचन अधिकृत राम बहादुर खत्रीले पद तथा गोपनीयताको सपथ खुवाउँदै सफल कार्यकालको शुभकामना दिएका थिए ।

त्यसअघि साधारण सभाको खुला सत्र सम्पन्न भएको थियो । खुला सत्रमा संस्थाको बार्षिक प्रतिवेदन, सचिवको प्रगति प्रतिवेदन र कोषाध्यक्षको लेखा प्रतिवेदन पनि सर्वसम्मतले पारित भएको थियो । यस्तै क्लवमा योगदान दिएका सल्लाहाकार विष्णु प्रसाद घिमिरे, क्लवका उपाध्यक्ष विष्णु गैरे र ज्येष्ठ सदस्य यम बहादुर थापालाई कदर पत्रले सम्मानित गरिएको थियो ।
कार्यक्रममा प्रमुख अतिथि वडा नम्बर २ का वडा अध्यक्ष तथा बाणगंगा नगरप्रवक्ता विष्णु पौडेलले बाणगंगा राइडर्स क्लव नगरको नौलो र मौलिक क्लव रहेको भन्दै प्रसंसा गरेका थिए ।

शरीर र वातावरण स्वस्थ राख्ने क्लव स्वस्थ हुन सके मात्र सामाजिक विकासमा टेवा पुग्ने उनको भनाई थियो । बाणगंगा नगरमा अझ थुप्रै कार्यहरु गर्न बाँकी रहेकाले आगामी दिनमा क्लवसंग नगर र वडाले सहकार्य गर्ने उनले प्रतिवद्धता जनाए ।
कार्यक्रममा लायन्स क्लव कपिलवस्तुका अध्यक्ष नवदत्त घिमिरे, पत्रकार चन्द्रकान्त न्यौपाने, राइडर्सहरु हरि पौडेल, यम प्रसाद थापा लगायतले बोलेका थिए ।

क्लवका अध्यक्ष सापकोटाको अध्यक्षता, सचिव बेलबासेको संचालन र उपाध्यक्ष गैरेको स्वागत मन्तव्यमा कार्यक्रम सफल भएको थियो । आधुनिक साइकल चलाएर प्रमुख अतिथि पौडेलले खुला सत्रको उद्घाटन गरेका थिए ।
बाणगंगामा साइकल चलाउनेहरुले खोलेको क्लवमा युवा जनसहभागिता बढ्दो छ भने पाकापुस्ता र बालबालिका पनि जोडिएका छन् । ३ । ४ जनाबाट सुरु भएको क्लवमा अहिले साधारण र आजिवन गरी ५५ सदस्य छन् ।

विहानविहान ५ बजे पहेलो र सेतो पोशाषकमा साइकल चढ्ने राइडर्सको समुहलाई देखेर धेरैको क्लवप्रति क्रेज र आकर्षण बढ्दो छ । साइकल चढ्ने मात्र नभएर क्लवले दिनदुखी र अशक्तहरुलाई पनि सहयोग गर्दै आइरहेको छ ।