काठमाडौँ । दुई दिनदेखि जारी झरी अहिले काठमाडौँमा रोकिएको छ । राजधानीमा बिहीबार रातिदेखि निरन्तर वर्षा हुँदै गएको थियो ।

वर्षाका कारण उपत्यकाका बागमतीसहितका नदी र सहायक खोलाहरूमा भीषण बाढी आएको थियो । बाढी र पहिरोका कारण काठमाडौँ उपत्यकामा मात्रै ३४ जनाले ज्यान गुमाएका छन् ।

सशस्त्र प्रहरीका अनुसार काठमाडौँमा ११, ललितपुरमा १८ र भक्तपुरमा ५ जना गरी ३४ जनाको ज्यान गएको हो ।

यस्तै काठमाडौँमा १० जना घाइते हुँदा ६ जना बेपत्ता र ललितपुरमा ५ जना घाइते हुँदा थप १५ जना बेपत्ता भएका छन् ।
जल तथा मौसम पूर्वानुमान महाशाखाले अब मौसम क्रमशः शिथिल बन्दै जाने बताएको छ । वर्षा रोकिएसँगै अब जनजीवन सहज बन्दै जाने विश्वास गरिएको छ ।