चन्द्रकान्त न्यौपाने, कपिलवस्तु । कपिलवस्तुको बाणगंगा नगरपालिका भित्रबाटै ठुलो मात्रामा सुनको अवैध कारोबार हुने गरेको तथ्य खुलेको छ । नगरपालिकाको वडा नम्बर ७ निवासी एक जना ब्यापारी सुन तस्करमा संलग्न भएको पाइएपछि इलाका प्रहरी कार्यालय बुटवलले सोमबार राति पक्राउ गरेबाट नगरमा सुन तस्कर हुने गरेको पाइएको हो ।

इलाका प्रहरी कार्यालय बुटवलका डिएसपी विजयराज पण्डितका अनुसार बाणगंगाको वडा नम्बर ७ कोइली बनगाईमा अर्घाखाँची सुनचाँदी पसल संचालन गरिरहेका बर्ष ३० का सन्तोष सुनार गयराति पक्राऊ परेका हुन् ।

‘सोमबार राति नै १० बजेको समयमा कपिलवस्तुबाट एउटा गाडी बुटवल हुँदै पूर्वतर्फ जाँदै थियो । त्यहि क्रममा बुटवल १० रामनगरमा शंका लागेर चेक जाँच गर्दा उक्त गाडीमा २९ तोला काँचो सुन भेटिएको हो’, डिएसपी पण्डित भन्छन् ‘गाडीमा सुनारका खलासी अकबर अली थिए ।’ लु २ ख ६५४२ नम्बरको बसमा अली रहेका थिए ।

मियाले दाँया खुट्टामा लगाउने जुत्ता भित्र खैरो रातो बुट्टे लेडीज व्यागमा कालो टेपले बेरेर चलाखी अपनाएका थिए । जाँचका क्रममा बेरीएको अवस्थामा पहेलो रङको सुन जस्तो देखिने बिस्कुट आकारको धातु २ थान फेला परेपछि थप जाँच गर्दा सुन रफेला पारिएको डिएसपी पण्डितले बताए ।

सुनको श्रोतको बारेमा अलीसंग बुझ्दा सन्तोष सुनारबाट सुन लिएको खुलेको हो । त्यसपछि उनको ठेगाना पत्ता लगाएर मंगलबार विहान साढे ३ बजे घरबाटै पक्राउ गरेर बुटवल ल्याइएको डिएसपी पण्डितले अपिटाइम्सलाई जानकारी दिए । सो सुनको मुल्यको हिसाब गर्दा ४९ लाख बढी हुने प्रहरीको भनाई छ ।

सो सुन तस्करी गरिएको हुन सक्ने भन्दै अनुसन्धान भइरहेको पण्डितले बताए । बरामद भएको सुन अहिले राजश्व अनुसन्धान शाखा बुटवलमा पठाइएको छ भने अली पनि प्रहरीको नियन्त्रणमा छन् । सन्तोष पहिलेदेखि नै कारोबारमा संलग्न भएको हुन सक्ने आशंका गरिएको छ ।

सन्तोषका बारेमा स्थानीयबासीसंग बुझ्दा उनले परिवारका अरु सदस्यलाई पनि जोडेर अवैध तरिकाले सुनको कारोबार गरेको जानकारीमा आएको छ । सन्तोषबारे परिवारका अरु सदस्य जोडिएको प्रहरीले भने अहिले पुष्टि गरेको छैन । सुनारबारे अनुसन्धान भइरहेकाले यसबारे विस्तृत कुराहरु पछि थाहा हुने प्रहरी बताउँछ ।

पछिल्लो समय सन्तोषले गरेको आर्थिक कारोबार अस्वभाविक देखिएको स्थानीयले नै शंका गर्न थालेको एक जनाले अपिटाइम्सलाई बताए । २९ तोला सुनमा सुनार नै संलग्न भएबाट उनी ठुलै तस्कर भएको तथ्य पुष्टि भएको स्थानीय बताउँछन् ।
सुन तस्करीको प्रमाणित भए सुनार र उनीसंग जोडिएका सबैलाई कानुनअनुसार कारबाही हुने प्रहरी बताउँछ । सुनार पक्राउ भएपछि यससंग जोडिएको थप नेक्सेस पत्ता लगाउन सहज हुने प्रहरीको भनाई छ ।

सुन तस्करको जालो बाणगंगामा रहेको थाहा पाएपछि यस क्षेत्रका सरोकारवाला पनि अचम्ममा परेका छन् । सन्तोषको पक्राउबारेको सुचना यस क्षेत्रमा गोप्य थियो भने कुनै मिडियाबाट पनि यो खबर अहिलेसम्म प्रकाशन भएको छैन । सन्तोषको पक्राउसंगै बाणगंगामा अन्यबाट पनि सुनको अवैध कारोबार भएको हुन सक्ने अनुमान गर्न थालिएको छ ।