जितपुर । कपिलवस्तुको सबैभन्दा सुन्दर र विकसित सहरको रुपमा अघि बढेको बाणगंगा नगरपालिकास्थित चार नम्बरमा बेग्लै आकारको फोहरदानी राखिएको छ । झट्ट हेर्दा माछा मार्न प्रयोग हुने ‘भुक’ आकारको फोहरदानी हरिबोधनी एकादशीको दिन पारेर राखिएको हो ।

बाणगंगाका वरिष्ठ समाजसेवी सागर श्रेष्ठ र युवा समाजसेवी शुशिल सिंह ठकुरी (गणेश) ले नीजि खर्चमा यो नयाँ आकारको फोहरदानी राखेका हुन् । चार नम्बरको तौलिहवा रोडको सुरुमै दाया र बाँयाँ यो फोहरदानी देख्न सकिन्छ भने फोहरदानीमा प्लाष्टिकजन्य वस्तु र बोतलहरु मात्र राख्न आग्रह गरिएको छ ।

केहि समयअघि दुवै जना सिद्धार्थ सामाजिक विकास संस्थासंग भारतको केरला राज्यको भ्रमणमा गएका थिए । त्यहाँ यस आकारका फोहरदानी देखेपछि उपयुक्त ठानी यसको कपि गरिएको ठकुरीले बताए । फलामका मसिना पाता जोडेर बनाइएको फोहरदानीको भित्रपट्टीबाट चारैतिर जाली छ भने मुखको भाग सानो छ ।

उनले भने, ‘देख्दा पनि राम्रो, पानी जम्मा पनि नहुने, झिँगा, मच्छर पनि नबस्ने, एकदमै राम्रो लागेर त्यसको फोटो खिचेर ल्यायौँ । अनि ग्रिललाई त्यो आकार देखाएपछि यहिँ यति सुन्दर फोहरदानी बन्यो । अब विस्तारै नगरपालिकाभरी यस्तै फोहरदानी राख्ने अभियान थाल्दछौँ ।’ श्रृंङ्गीघाट सामुदायिक वनका अध्यक्ष समेत रहेका ठकुरीले वनले पनि यस्तो फोहरदानी बनाउन प्रयास गर्ने बताए ।

समाजसेवी श्रेष्ठले यो बनाउँदा महंगो भए पनि निकै उपयुक्त रहेको बताए । उनका अनुसार चार नम्बरमा राखिएको सानो फोहरदानी बनाउन १५ र ठुलो फोहरदानीलाई २० हजार रुपैयाँ लागेको छ । यस फोहरदानीलाई १५ औँ कपिलवस्तु महोत्सवमा पनि नमुनाको रुपमा राखिने ठकुरीले बताए ।

चार नम्बरमा निस्कने प्लाष्टिकजन्य फोहर मात्र राख्न श्रेष्ठको आग्रह छ । पर्यावरण स्वच्छ राख्ने सन्देश दिन फोहरदानीको रङ हरियो बनाइएको उनीहरुले बताएका छन् ।